बीरगन्ज,०७ असोज । जेनजी आन्दोलनका क्रममा तोडफोड भई क्षति पुगेको वीरगञ्ज गण्डक प्रहरी चौकीलाई पुनः सञ्चालनमा ल्याउन आवश्यक सामग्री सहयोग प्रदान गरिएको छ।
उक्त सहयोग उत्कर्ष नेपाल, उपकार सेवा नेपाल र बीरगन्ज पब्लिक कलेज (BPC) को संयुक्त पहलमा गरिएको हो। सहयोगअन्तर्गत प्रहरी चौकीलाई दैनिक कामकाज र सेवाप्रवाह सहज बनाउनका लागि कुर्सी, टेबल, चालाकल, इलेक्ट्रिक मोटर, खाना पकाउने भाँडाकुडा, बेडसिट, डसना र तकिया लगायतका सामग्री हस्तान्तरण गरिएको छ।
यस सहयोगले प्रहरी चौकीलाई पुनः सेवा सञ्चालनमा मद्दत पुग्ने र स्थानीय सुरक्षालाई व्यवस्थित बनाउन योगदान पुग्ने अपेक्षा गरिएको छ। कार्यक्रमका क्रममा उपकार सेवा नेपालकी अध्यक्ष विद्या कुमारी सरावगी, सदस्य सुमन बगेडिया, संरक्षक पद्मा देवी सरावगी, BPC कलेजका दीपक शाक्य र उत्कर्ष नेपालका प्रतिनिधिहरू उपस्थित थिए।
उपस्थितहरूले तीन संस्थाको अग्रसरतामा गरिएको यो पहलले प्रहरी–समुदाय सहकार्यलाई अझ सुदृढ बनाएको बताएका छन्।
