बीरगन्ज,०८ असोज । आर्थिक वर्ष २०८२/०८३ सुरु भएको दुई महिना बितिसक्दा पनि पर्सा र बाराका केही स्थानीय तहहरूले खाता सञ्चालन गर्न सकेका छैनन् । पर्साका १४ मध्ये ८ पालिकाले मात्र खाता सञ्चालन गरेर बजेट निकासा लिएका छन् भने बाराका १६ मध्ये १४ पालिकाले खाता सञ्चालन गरेका छन् ।
कोष तथा लेखा नियन्त्रक कार्यालय पर्साका प्रमुख मनोजकुमार जोशीका अनुसार मङ्गलवारसम्म बीरगन्ज महानगरपालिका, पोखरिया नगरपालिका, पर्सागढी नगरपालिका, ठोरी गाउँपालिका, पटेर्वा सुगौली गाउँपालिका, जगरनाथपुर गाउँपालिका, छिपहरमाई गाउँपालिका र कालिकामाई गाउँपालिकाले मात्र खाता सञ्चालन गरी बजेट निकासा लिएका छन् । बाँकी ६ पालिका—बहुदरमाई नगरपालिका, विन्दवासिनी गाउँपालिका, सखुवा प्रसौनी गाउँपालिका, पकहाँ मैनपुर गाउँपालिका, धोबिनी गाउँपालिका र जिराभवानी गाउँपालिकाले खाता सञ्चालनका लागि आवश्यक फाइलसमेत पेस गरेका छैनन् ।
बाँकी ६ पालिका—बहुदरमाई नगरपालिका, विन्दवासिनी, सखुवा प्रसौनी, पकहाँ मैनपुर, धोबिनी र जिराभवानी गाउँपालिकाले भने आवश्यक प्रक्रिया नै सुरु गरेका छैनन्। यीमध्ये धोबिनी, पकहाँ मैनपुर र विन्दवासिनीमा गाउँसभा नहुनु मुख्य कारण बनेको छ।
बारा जिल्लामा भने १६ मध्ये १४ पालिकाले खाता सञ्चालन गरिसकेका छन्। तर निजगढ नगरपालिका र बारागढी गाउँपालिकाले अझै प्रक्रिया पूरा गर्न सकेका छैनन्। जेन–जी आन्दोलनका क्रममा तोडफोड र आगजनी हुँदा यी पालिकामा ढिलाइ भएको हो।
दसैं नजिकिँदै गर्दा खाता सञ्चालनमा ढिलाइ भएकाले कर्मचारीको तलब तथा भत्ता वितरणमा समस्या हुने र विकास निर्माण कार्य रोकिने जोखिम बढेको सरोकारवालाहरूको भनाइ छ।
