बीरगन्ज,११ असोज । बीरगन्ज बसपार्क चौकीका सहायक निरीक्षक धिरेन्द्र थपलियामाथि व्यापारीसँग घुस माग्ने, धम्की दिने र अनैतिक गतिविधि संरक्षण गर्ने गम्भीर आरोप लागेको छ।
पीडित व्यवसायीहरूले बताएका छन् कि दशैं खर्च नदिएको कारण आफूलाई दादागिरी शैलीमा फसाउने, उठाएर लग्ने र हात हालेर अपमान गर्ने धम्की दिइएको छ। उनीहरूले घटना प्रमाणित गर्न भिडियो समेत सुरक्षित गरेको बताएका छन्।
व्यापारीहरूले थप आरोप लगाए कि बसपार्क क्षेत्रमा सञ्चालित होटल–रेस्टुरेन्ट र रक्सी पसलहरू प्रहरी संरक्षणमा राति अबेरसम्म खुलेआम सञ्चालन भइरहेका छन्। दिनभर साना पसल खोलेर जीविका चलाउने व्यवसायीमाथि भने बारम्बार सिपाही पठाएर असुली गर्ने र पैसा नदिए धम्की दिने कार्य भइरहेको दाबी गरेका छन्।
स्थानीय व्यवसायी र बासिन्दाले सम्बन्धित निकायलाई दोषीलाई तत्काल कारबाही गर्न माग गरेका छन् र घटना गम्भीर ढंगले छानबिन गर्न जोड दिएका छन्।
