काठमाडौं,१९ असोज । देशभर लगातार परेको अविरल वर्षाका कारण असोज १८ र १९ गते विभिन्न स्थानमा भएको बाढी, पहिरो, चट्याङ, गाडी दुर्घटना र खोलाले बगाउँदा कम्तीमा ४० जनाको मृत्यु भएको छ। प्रहरीका अनुसार ११ जना अझै बेपत्ता छन्।
मानवीय क्षतिका हिसाबले कोशी प्रदेश सबैभन्दा प्रभावित बनेको छ। इलाममा मात्रै बाढी र पहिरोका कारण २८ जनाको मृत्यु भएको पुष्टि भएको छ। त्यस्तै उदयपुर, खोटाङ र पाँचथर जिल्लामा गरेर ९ जनाको ज्यान गएको छ, भने ५ जना अझै सम्पर्कविहीन छन्।
मधेस प्रदेशको रौतहटमा ३ जनाको मृत्यु भएको छ भने बारामा १ जना बेपत्ता छन्। बागमती प्रदेश अन्तर्गतको रसुवामा ४ जना र काठमाडौँमा १ जना बेपत्ता भएका छन्।प्रहरी, सशस्त्र प्रहरी बल, नेपाली सेना र स्थानीयवासीको सहयोगमा उद्धार तथा राहत कार्य जारी रहेको छ। पहिरो र बाढीले सडक अबरुद्ध बनाएका कारण केही ठाउँमा उद्धारमा कठिनाइ आएको बताइएको छ।
जलवायु विज्ञहरूले अझै केही दिन वर्षा जारी रहने अनुमान गरेका छन्। यस्तैमा प्रहरी र विपद् व्यवस्थापन निकायहरूले नागरिकहरूलाई सतर्क रहन, जोखिमयुक्त क्षेत्रमा नबस्न र आवश्यक परेमा सुरक्षित स्थानमा सर्न आग्रह गरेका छन्। सरकारले बाढीपहिरो पीडितका लागि राहत प्याकेज घोषणा गर्ने तयारी गरिरहेको जानकारी प्राप्त भएको छ।
