चितवन,२० असोज । नारायणगढ–मुग्लिन सडकखण्डअन्तर्गत भरतपुर महानगरपालिका–१ भतेरी जंगलमा आज बिहान कार र दुईवटा मोटरसाइकल आपसमा ठोक्किँदा तीन जना घाइते भएका छन्। प्रहरीका अनुसार नारायणगढबाट मुग्लिनतर्फ जाँदै गरेको बा.प्र.०१–०३३ च २६२७ नम्बरको कारले ग २३ प ३०९२ नम्बर र बा.प्र.०६–००१ प ९३९१ नम्बरका मोटरसाइकललाई ठक्कर दिएको थियो।
दुर्घटनामा कास्कीको पोखरा महानगरपालिका–११ का ३६ वर्षीय राजु आचार्य, गोरखा भीमसेन थापा गाउँपालिका–१ का ५६ वर्षीय खड्गप्रसाद पौडेल र उनकी श्रीमती ४५ वर्षीया रेखाकुमारी पौडेल घाइते भएका छन्।
घाइते तीनै जनाको भरतपुरस्थित नयाँ मेडिकल कलेजमा उपचार भइरहेको जिल्ला प्रहरी कार्यालय चितवनका प्रवक्ता प्रहरी नायब उपरीक्षक रविन्द्र खनालले जानकारी दिएका छन्।
प्रहरीले कार चालक धनुषा जिल्लाको मिथिला बिहारी नगरपालिका–१० का ३७ वर्षीय रामनारायण यादवलाई नियन्त्रणमा लिएर आवश्यक अनुसन्धान सुरु गरेको जनाएको छ।
