सर्लाही,२२ असोज । सर्लाहीको मलङ्गवा नगरपालिका–५ भाडसरस्थित लखन्देही नदीमा नुहाउने क्रममा एक युवकको डुबेर मृत्यु भएको छ । मृतकको परिचय सोही ठाउँका १८ वर्षीय ओम ठाकुरका रूपमा खुलेको जिल्ला प्रहरी कार्यालय सर्लाहीले जनाएको छ ।
प्रहरीका अनुसार मंगलबार दिउँसो ठाकुर आफ्ना तीन साथीहरूसँग नदीमा नुहाउन गएका थिए । सो क्रममा तीव्र बहावका कारण सबै खोलाले बगाएका थिए । तीमध्ये तीन जना पौडिएर ज्यान जोगाउन सफल भए पनि ठाकुर बेपत्ता भएका थिए ।
घटनास्थलमा पुगेको प्रहरी टोलीले स्थानीयको सहयोगमा खोजी जारी राख्दा केही समयपछि ठाकुरलाई खोलामा तैरिरहेको अवस्थामा फेला पारेको थियो । उनलाई तुरुन्तै उद्धार गरी प्रादेशिक अस्पताल मलङ्गवा पुर्याइए पनि चिकित्सकले मृत घोषित गरेका थिए ।
प्रहरी नायब उपरीक्षक सरोज राईका अनुसार नदीमा हालको वर्षाका कारण पानीको बहाव अत्यधिक भएको र सोही कारण दुर्घटना भएको अनुमान गरिएको छ । घटनाबारे थप अनुसन्धान भइरहेको प्रहरीले जनाएको छ ।
