काठमाडौं,२२ असोज । नेकपा एमालेका पोलिटब्युरो सदस्य महेश बस्नेतसँग साइबर ब्युरोले बुधबार सोधपुछ गरेको छ ।
भोटाहिटीस्थित साइबर ब्युरोमा बोलाइएका बस्नेतसँग विद्युतीय कारोबार ऐन अन्तर्गत दर्ता भएको जाहेरीका सम्बन्धमा बयान लिइएको ब्युरोका एसपी दीपकराज अवस्थीले जानकारी दिए । जाहेरी शोभा पाठकले दर्ता गरेकी थिइन् ।
बस्नेत बुधबार दिउँसो ब्युरोमा उपस्थित भएर बयानका कागजातका विषयमा सोधपुछमा सहभागी भएका हुन् । यसअघि सो मुद्दा ब्युरोको अनुरोधमा सरकारी वकिल कार्यालयले तामेलीमा राखेको थियो ।
जेन–जी आन्दोलनपछि बस्नेतले सामाजिक सञ्जालमार्फत पीडित महिलालाई लक्षित गर्दै अपशब्द प्रयोग गरेको र बस्नेतसम्बन्धी फ्यान क्लबमार्फत समेत अपमानजनक टिप्पणीहरू पोस्ट गरिएको भन्दै सरकारी वकिल कार्यालयले असोज ५ गते ब्युरोलाई अनुसन्धान अघि बढाउन निर्देशन दिएको थियो ।
त्यसपछि प्रहरीले बस्नेतको पक्राउ अनुमति मागेपनि काठमाडौँ जिल्ला अदालतले थप प्रमाण संकलन गरेर मात्र प्रक्रिया अघि बढाउन आदेश दिएको थियो ।
हाल अनुसन्धान अधिकारीहरूले बस्नेतको फेसबुक पोस्ट र फ्यान क्लबमा प्रकाशित सामग्रीका आधारमा सोधपुछ गरिरहेको बताइएको छ ।
यसैबीच, बस्नेतविरुद्ध बलात्कार र भ्रूणहत्या मुद्दा नचलाउने सरकारको निर्णयबारे दायर रिट उच्च अदालत पाटनमा विचाराधीन अवस्थामा रहेको छ ।
