काठमाडौं,२२ असोज । नेकपा एमालेका पोलिटब्यूरो सदस्य तथा सांसद महेश बस्नेतले वर्तमान सरकारलाई एमाले अध्यक्ष र पूर्व प्रधानमन्त्री केपी शर्मा ओलीलाई पक्राउ गरेर देखाउन खुला चुनौती दिएका छन्।
बुधबार पार्टी केन्द्रीय कार्यालय च्यासलमा पत्रकार सम्मेलन गर्दै बस्नेतले भने, “तिम्रो बाउको हिम्मत छ भने केपी ओलीलाई पक्राउ गरेर देखाऊ। यदि ओली दोषी हुनुहुन्छ भने कानूनी रूपमा प्रमाणित गर।” उनले सरकारमाथि राजनीतिक द्वेषका आधारमा दमन र उजुरीको खेल चलाएको आरोप पनि लगाए।
बस्नेतमाथि मंगलबार केही जेनजी आन्दोलनका अगुवाहरूले दमनको आरोप लगाउँदै प्रहरीमा उजुरी दिएका थिए। सो उजुरीलाई प्रहरीले गौरीबहादुर कार्की नेतृत्वको जाँचबुझ आयोगमा पठाएको थियो। त्यसको भोलिपल्टै बस्नेतले यो कठोर प्रतिक्रिया दिएका हुन्।
सम्पत्ति शुद्धीकरणसम्बन्धी अनुसन्धान दलका नेताहरूमा केन्द्रित हुन थालेको विषयमा पनि उनी आक्रोशित बने। उनले सरकारलाई युवाहरूको सहयोगमा सत्तामा पुगेका नेताहरूमाथि समेत अनुसन्धान गर्न चुनौती दिए।
बस्नेतले अर्थमन्त्री रामेश्वर खनाल र ऊर्जामन्त्री कुलमान घिसिङको नाम लिँदै भने, “यदि सत्यनिष्ठाको कुरा हो भने अनुसन्धान उनीहरूबाट सुरु गर्नुपर्छ। सबैलाई एउटै मापदण्डले हेर्नुपर्छ।”
आफूहरू पूर्ण शुद्ध नभएको स्वीकार गर्दै उनले भने, “हामी दूधले नुहाएका होइनौं, तर निराधार आरोप पनि सहिँदैन। यदि महेश बस्नेत भ्रष्टाचारी हो भने प्रमाणसहित कारबाही गर, होइन भने मनपरी आरोप लगाउन पाइँदैन।”
बस्नेतले एमालेले जेनजी आन्दोलन र पछिल्ला राजनीतिक घटनाक्रमबारे औपचारिक धारणा छिट्टै सार्वजनिक गर्ने जानकारी पनि दिए। उनका अनुसार, “२४ गते सचिवालय र २७ गते केन्द्रीय कमिटी बैठक बस्दैछ। यही महिनाभित्र पार्टीले आफ्ना अफिसियल धारणा सार्वजनिक गर्नेछ।”
