सर्लाही,२३ असोज । सर्लाहीको बागमती नगरपालिका–६, राधाकृष्ण मन्दिर नजिक बाँसघारीबाट प्रहरीले लागूऔषधसहित एक युवकलाई पक्राउ गरेको छ। पक्राउ पर्ने युवक २८ वर्षीय जीवन घिसिङ हुन्।
प्रहरी चौकी राजघाटबाट खटिएको टोलीले मंगलबार साँझ उनलाई शंकास्पद अवस्थामा भेटेपछि नियन्त्रणमा लिएको र खानतलासी गर्दा उनको साथबाट विभिन्न प्रतिबन्धित लागूऔषध फेला परेको प्रहरीले जनाएको छ।
बरामद गरिएको सामानमा ट्रामन–५० लेखिएको २१४ क्याप्सुल, स्पास्मोम लेखिएको २०० क्याप्सुल, करिब २५ ग्राम गाँजा, नगद रु २,५३०, सिम कार्ड सहितको मोबाइल फोन र बा।प्र। ०२–०३० प ५५७० नम्बरको एनएस मोटरसाइकल रहेका छन्।
पक्राउ परेका घिसिङलाई इलाका प्रहरी कार्यालय बरहथवमा राखिएको छ। प्रहरीका अनुसार उनलाई लागुऔषध नियन्त्रण ऐन अन्तर्गत मुद्दा दर्ता गरी जिल्ला अदालत सर्लाहीबाट ७ दिनको म्याद थप गरी अनुसन्धान जारी रहेको छ।
