नेपालगन्ज, २३ असोज । नेपालगन्ज उपमहानगरपालिका–४ बाईपास रोडमा सञ्चालित मौरी रेस्टुरेन्टमा जुवातास खेलिरहेको अवस्थामा प्रहरीले १४ जनालाई १३ लाख ६३ हजार ८०० रुपियाँ नगदसहित पक्राउ गरेको छ।
जिल्ला प्रहरी कार्यालय बाँकेका अनुसार रेस्टुरेन्ट सञ्चालक विज्ञान श्रेष्ठले सञ्चालन गरेको उक्त रेस्टुरेन्टको दोस्रो तलामा गोप्य रूपमा जुवातास खेल्ने कार्य भइरहेको सूचना पाएपछि बुधबार राति करिब साढे १२ बजे प्रहरीले छापा मारेको थियो।
प्रहरीले स्थलबाट दुई गड्डी खोलिएका र आठ गड्डी नखोलिएका तास, रातो र सेतो रंगका पर्दा दुई थान तथा नगद रकम बरामद गरेको जनाएको छ।
पक्राउ परेकामध्ये विज्ञान श्रेष्ठ, गणेश बस्नेत, सेताज अन्सारी, ऋषि गुप्ता, तरुण गौतम, विनोद खड्का, मोहम्मद सफिक बेहना, संगम शाह, मधुसूदन दाहाल, मेघराज गौतम, रमेश शाही, भागीरथ यादव, नन्दलाल यादव र सुमन केसी रहेका छन्।
बाँकेका प्रहरी प्रमुख प्रहरी उपरीक्षक (एसपी) अंगुर जिसीको निर्देशनमा खटिएको टोलीले पक्राउ परेकामाथि आवश्यक अनुसन्धान अघि बढाएको जिल्ला प्रहरी कार्यालय बाँकेका प्रवक्ता तथा प्रहरी नायब उपरीक्षक दीपक पातलीले जानकारी दिए।
उनका अनुसार पछिल्लो समय नेपालगन्जका होटल, रेस्टुरेन्ट र निजी घरहरूमा जुवातास खेल्ने प्रवृत्ति बढ्दै गएको पृष्ठभूमिमा प्रहरीले निगरानी र कारबाहीलाई कडाइ गरेको छ। “जुवातास सामाजिक अपराध हो। यसले समाजमा अनुशासन, शान्ति र सद्भावमा असर पार्ने भएकाले प्रहरीले यसलाई नियन्त्रणमा ल्याउन विशेष अभियान सञ्चालन गरेको छ,” डीएसपी पातलीले भने।
प्रहरीले नागरिकलाई यस्ता अवैध गतिविधिबाट टाढा रहन र जानकारी भएमा तुरुन्त प्रहरीलाई सूचित गर्न आग्रह गरेको छ।
