काठमाडौं,२४ असोज । गत भदौमा भएको प्रदर्शनका क्रममा यातायात व्यवस्था कार्यालयमा आगजनी हुँदा नयाँ सवारी चालक अनुमतिपत्र (लाइसेन्स) आवेदन प्रक्रिया ठप्प भएको छ। आगलागीबाट २२ हजारमध्ये करिब १८ हजार लाइसेन्स जलेको विभागको अनुमान छ भने ३ हजार मात्र सुरक्षित फेला परेको छ।
यातायात व्यवस्था विभागका निर्देशक केशव खतिवडाका अनुसार, प्रणाली नचल्दा यकिन तथ्यांक थाहा पाउन सकिएको छैन। जलेका वा हराएका लाइसेन्सको लागि मुचुल्का उठाएर सेवाग्राहीलाई निःशुल्क पुनःप्रिन्ट गर्ने योजना छलफलमै छ।
विभागले साउनसम्म उत्पादन भएका ८ लाख १९ हजार ५९ वटा इम्बोस्ड नम्बर प्लेटमध्ये करिब ६ लाख १९ हजार प्लेट आगलागीमा नष्ट भएको जनाएको छ। बाँकी सुरक्षित प्लेट मात्र विभिन्न प्रदेश कार्यालयमा पठाइएको थियो।
महानिर्देशक राजीव पोखरेलका अनुसार, प्रणाली तिहारपछि सञ्चालनमा आउने छ। प्रारम्भमा नयाँ लाइसेन्सको आवेदन खुलाउने प्रणाली सुरु गरिने र क्रमशः पूर्ण सेवा दिइने योजना छ।
अहिले ४२ वटा यातायात कार्यालयमा लाइसेन्ससम्बन्धी सेवा ठप्प छ। विभागले आवश्यक उपकरण र डिभाइसको खरिद गरी चार–पाँच महिनाभित्र प्रणाली पूर्ण रूपमा सञ्चालन गर्ने तयारी गरिरहेको छ।
