बीरगन्ज,२४ असोज । बीरगन्ज महानगरपालिकाले अस्थायी, करार र ज्यालादारी कर्मचारीहरूको म्याद नथाप्ने निर्णय गरेको छ। स्वीकृत दरबन्दी बाहेकका यी कर्मचारीहरू असोज मसान्तदेखि काममा नियुक्त हुन पाउने छैनन्।
महानगरपालिकाले यो कदम नेपाल सरकारको मन्त्रिपरिषद्को निर्णय, अर्थ मन्त्रालयको परिपत्र र संघीय मामिला तथा सामान्य प्रशासन मन्त्रालयको विज्ञप्तिलाई आधार बनाएर चालिएको जनाएको छ।
महानगरपालिकाका प्रशासन तथा व्यवस्थापन महाशाखा प्रमुख सुनिल कुमार कर्णले २०८२ असोज २१ गते निर्णयानुसार सार्वजनिक सूचना जारी गर्दै अस्थायी प्रकृतिका कर्मचारीहरूलाई असोज मसान्तपछि काममा नलगाउन निर्देशन दिएका छन्।
सरकारले २०८२ असोज ५ गते विभिन्न सरकारी निकायमा अनावश्यक रूपमा राखिएका अस्थायी कर्मचारी हटाउने र प्रशासनिक खर्च घटाउने नीति लिएको थियो। त्यसैअनुरूप अर्थ मन्त्रालयको असोज ७ गतेको परिपत्र र संघीय मामिला तथा सामान्य प्रशासन मन्त्रालयको असोज ८ गतेको विज्ञप्तिले निर्णयको कार्यान्वयन थप स्पष्ट पारेको छ।
अब सरकारी निकायहरूले स्थायी दरबन्दी बाहेकका अस्थायी कर्मचारीहरूलाई निरन्तरता दिन नपाउने स्थिति स्पष्ट भएको छ।
