बीरगन्ज,२५ असोज । पर्सा र बारामा हैजा तथा झाडापाखालाको प्रकोप अझै नियन्त्रणमा नआएपछि असोज २६ गतेदेखि हैजाविरुद्धको खोप अभियान सुरु गर्न लागिएको छ। डेढ महिनाअघि भदौ ६ गतेदेखि फैलिएको महामारीका कारण अहिले पनि वीरगञ्जका अस्पतालहरूमा बिरामीको उपचार जारी छ।
स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार असोज २६ गतेदेखि कात्तिक २ गतेसम्म सञ्चालन हुने अभियानमा करिब ६ लाख ५४ हजार जनालाई हैजाविरुद्धको खोप दिइनेछ।
“एक वर्ष उमेर माथिका सबै व्यक्तिहरूलाई यो खोप दिइनेछ,” ठाकुरले बताए।
अभियानका लागि जिल्लाभर १ हजार ९५० खोप केन्द्र स्थापना गरिनेछ। यी केन्द्रहरू पालिका कार्यालय, स्वास्थ्य संस्था, विद्यालय, कलेज, मन्दिर, मस्जिद, गुम्बा, बसपार्क, नेपाल–भारत सीमा नाका र उद्योग क्षेत्रलगायत स्थानमा सञ्चालन गरिने जनाइएको छ।
खोप वितरणका लागि १ हजार ५४४ महिला स्वास्थ्य स्वयंसेविका र ३५० स्वास्थ्यकर्मी गरी कुल १ हजार ८९४ जनशक्ति परिचालन गरिनेछ।
यससँगै बाराका १६ मध्ये ६ पालिकामा पनि हैजा खोप अभियान सुरु हुने भएको छ। ती पालिकामा कलैया र जीतपुरसिमरा उपमहानगरपालिका, परवानीपुर, प्रसौनी, फेटा र विश्रामपुर गाउँपालिका रहेका छन्।
सरकारले अभियानका लागि १० लाख १८ हजार १ सय डोज खोप आयात गरिसकेको छ। स्वास्थ्य अधिकारीहरूका अनुसार हैजा प्रभावित क्षेत्रसँगै जोखिमयुक्त स्थानमा पनि यो खोप अभियान सञ्चालन गरेर संक्रमण फैलिन नदिन महत्वपूर्ण योगदान पुग्ने अपेक्षा गरिएको छ।
