काठमाडौं,२६ असोज । नेपाली कांग्रेस निकट नेपाल विद्यार्थी संघ (नेविसंघ) ले काठमाडौं महानगरका मेयर बालेन्द्र शाह (बालेन) र हामी नेपाल अभियानका संयोजक सुदन गुरुङ विरुद्ध प्रहरीमा उजुरी दर्ता गरेको छ।
नेविसंघका अनुसार, भदौ २३ र २४ गते भएको जेनजी युवा आन्दोलनका क्रममा तोडफोड, आगजनी र सम्पत्तिमा क्षति पु–याउने घटनामा उनीहरूको संलग्नता रहेको भन्दै काठमाडौं र ललितपुर प्रहरी परिसरमा उजुरी दिइएको हो। उजुरीमा उनीहरूले युवालाई आन्दोलनमा उक्साएको आरोपसमेत लगाइएको छ।
२४ घण्टाभित्र पक्राउ गरी अनुसन्धान अघि बढाउन नेविसंघले माग गर्दै चेतावनी दिएको छ कि यदि माग पूरा नभए कडा आन्दोलनमा उत्रिनेछ। उजुरी नेविसंघका केन्द्रीय सदस्य मनीषजंग थापा, अशोकसिंह विष्ट र विजय शाह द्वारा दर्ता गरिएको हो।
यसअघि जेनजी आन्दोलनका क्रममा ‘राज्यद्वारा दमन गरिएको’ भन्दै तत्कालीन प्रधानमन्त्री केपी शर्मा ओली र गृहमन्त्री रमेश लेखकलगायतविरुद्ध पनि उजुरी दर्ता गरिएको थियो। त्यसपछि एमाले निकट अनेरास्ववियुले पनि आन्दोलनकारीविरुद्ध उजुरी दिएको थियो।
