सर्लाही,२६ असोज । धनुषाको इलाका प्रहरी कार्यालय यदुकुहाका प्रमुख प्रहरी निरीक्षक ओमप्रकाश यादवलाई २०८२ साल असोज महिनाको ‘उत्कृष्ट प्रहरी (Police of the Month)’ घोषित गरिएको छ।
निरीक्षक यादवले पछिल्लो महिनामा १४ जना फरार प्रतिवादी पक्राउ, हुण्डी कारोबारमा संलग्न दुई भारतीय नागरिकसहित रु. १ लाख ४७ हजार भारतीय र रु. ८ लाख ५० हजार नेपाली नगद बरामद गरी कानूनी कारबाही अघि बढाएका थिए।
त्यस्तै, उनले अनलाइन ठगीमा संलग्नहरूलाई पक्राउ गरी पीडितको रकम फिर्ता गराउने, बिदेह नगरपालिका–५ की रामपरी देवी बरही ठाकुरको हत्याका अभियुक्त संगम पासवान पक्राउ गर्ने, र जेनजी आन्दोलनका क्रममा सम्भावित आगजनी तथा लुटपाट रोक्न निर्णायक भूमिका निभाएका थिए।
धार्मिक विवादका घटनामा पनि यादवले सक्रिय भूमिका खेलेका थिए। विशेषगरी जनकपुर–२० रुपैठामा गणेश र दुर्गा मूर्तिसम्बन्धी विवादमा हिन्दु–मुस्लिम समुदायबीचको तनाव नियन्त्रण गरी भिड तितरबितर पार्ने उनको नेतृत्व प्रशंसनीय भएको संगठनले जनाएको छ।
प्रहरी संगठनका अनुसार, यादवले आफ्नो जिम्मेवारी उच्च पेशागत दक्षता, निष्ठा र जिम्मेवारीपूर्वक निर्वाह गरेका कारण उनलाई असोज महिनाको ‘उत्कृष्ट प्रहरी’को रूपमा सम्मान गरिएको हो।
