रौतहट,२७ असोज । रौतहटको गौर नगरपालिका–१ स्थित सीमा नजिकको क्षेत्रमा बाढीको पानीमा डुबेर तीन बालिकाको मृत्यु भएको छ।
मृतकहरूमा राजदेवी नगरपालिका–८ की १३ वर्षीया आस्था कुमारी बैठा, १५ वर्षीया रागनी यादव र मौसमी बैठा रहेको जिल्ला प्रहरी कार्यालय रौतहटले जनाएको छ।
सात जनाको समूह घाँस लिन गौरतर्फ जाँदै गर्दा ती बालिकाहरू आकस्मिक रूपमा बाढीको खोल्सामा बगेका थिए। स्थानीय बासिन्दा र प्रहरीले तत्काल उद्धार कार्य सुरु गर्दै चार जनालाई सकुशल बचाएका छन् भने तीन जनाको शव बाहिर निकालिएको छ।
घटनास्थलमा अहिले पनि प्रहरी टोली परिचालन गरिएको छ भने मृतक बालिकाहरूको शव पशुपतिनगर अस्पताल गौरमा पोस्टमार्टमका लागि पठाइएको छ।
