जनकपुर,२७ असोज । मधेश प्रदेशका मुख्यमन्त्री सतिश कुमार सिंहले आफ्नो पद जोगाउन अन्तिम संवैधानिक प्रयास गर्दै भोलि प्रदेश सभामा विश्वासको मत लिने भएका छन्।
दुई प्रमुख साझेदार दल नेकपा एमाले र नेपाली कांग्रेसले समर्थन फिर्ता लिएपछि अल्पमतमा परेका मुख्यमन्त्री सिंहले असोज २८ गते प्रदेश सभाको छैठौं अधिवेशनमा नेपालको संविधानको धारा १८८ को उपधारा (२) अनुसार विश्वासको मतका लागि प्रस्ताव पेश गर्नेछन्। प्रस्तावमाथि छलफलपछि मतदान हुनेछ।
प्रदेश सभा सदस्यहरूलाई व्यक्तिगत फोनमार्फत सहयोग माग्दै रहेका मुख्यमन्त्री सिंहले हाल नेपाली कांग्रेस, नेकपा एमाले, नेकपा माओवादी केन्द्रलगायतका प्रमुख दलका नेताहरूसँग सम्पर्कमा छन्। नेपाली कांग्रेसका एक सदस्यले मुख्यमन्त्री सिंहले आफूलाई सहयोगका लागि फोन गरेको पुष्टि गरेका छन्।
हालको राजनीतिक गणित अनुसार, प्रदेशसभामा ५४ सदस्यको बहुमत आवश्यक भए पनि मुख्यमन्त्रीको सरकारले स्पष्ट बहुमत गुमाइसकेको छ। विपक्षी गठबन्धनले ५८ सदस्यको हस्ताक्षरसहित बहुमत दाबी पेश गरिसकेको छ। यसैले, गणितीय रूपमा भोलिको मतदानमा मुख्यमन्त्री सिंहले विश्वासको मत पाउने सम्भावना न्यून देखिएको छ।
तर, मुख्यमन्त्री सिंहले संवैधानिक प्रक्रिया पूरा गर्ने अडान भने कायम राखेका छन्।
