बीरगन्ज,२८ असोज । पर्सा प्रहरीले बीरगन्जस्थित एक होटलमा जुवातास खेलिरहेको अवस्थामा तीन जनालाई पक्राउ गरेको छ। विशेष सूचनाका आधारमा गरिएको प्रहरी छापामारीमा जुवामा संलग्न व्यक्तिहरूसहित नगद र तासका पत्ता बरामद गरिएको प्रहरीले जनाएको छ।
जिल्ला प्रहरी कार्यालय पर्साका प्रवक्ता तथा प्रहरी नायव उपरीक्षक (डीएसपी) किशोर लम्सालका अनुसार गएराति करिब ९ः४५ बजे बीरगन्ज महानगरपालिका–१६, फुलवारी टोलमा रोशन रौनियारले सञ्चालन गरेको होटलमा प्रहरीले छापा मारेको थियो।
छापामारीका क्रममा जुवा खेलिरहेको अवस्थामा वीरगन्ज–१६ का २० वर्षीय रोहित रौनियार, ३० वर्षीय श्यामबाबु राय र बीरगन्ज–१५ का २५ वर्षीय अनन्त कुमार गुप्ता पक्राउ परेका छन्।
प्रहरीले जुवाखालबाट नगद ५० हजार ७ सय ५५ रुपैयाँ र तीन बुक तास बरामद गरेको छ।
पक्राउ परेकाहरूमाथि जुवा सम्बन्धी कसूरअन्तर्गत अनुसन्धान भइरहेको प्रहरीले जनाएको छ। यसका लागि जिल्ला प्रशासन कार्यालय पर्साबाट पाँच दिनको म्याद थप गरिएको प्रवक्ता डीएसपी लम्सालले जानकारी दिएका छन्।
