काठमाडौं,२८ असोज । गत भदौ २४ गतेको जेनजी आन्दोलनका क्रममा बुढानीलकण्ठस्थित निवासमा कुटपिटमा परेर घाइते भएका नेपाली कांग्रेसका सभापति शेरबहादुर देउवा घटनाको ३४ दिनपछि पहिलोपटक सार्वजनिक भएका छन् ।
मंगलबार पार्टी केन्द्रीय कार्यालय सानेपामा बसेको केन्द्रीय समिति बैठकमा सहभागी हुन जाने क्रममा देउवा सार्वजनिक रूपमा देखा परेका हुन्। यसअघि उनी सार्वजनिक कार्यक्रममा देखिएका थिएनन् । भदौ २४ को आन्दोलनका क्रममा देउवा र उनकी पत्नी आरजु राणा देउवा आन्दोलनकारीको घेराउमा परेका थिए । नेपाली सेनाले पटकपटक हेलिकप्टरबाट उद्धार गर्ने प्रयास गरे पनि सम्भव नभएपछि स्थलमार्गबाट उनीहरूलाई उद्धार गरी अस्पताल पुर्याएको थियो ।
टाउकोमा गम्भीर चोट लागेका देउवालाई १२ टाँका लगाइएको जानकारी पछि कांग्रेस नेता मीन विश्वकर्माले पत्रकार सम्मेलनमार्फत दिएका थिए। सुरक्षाको कारण देखाउँदै उनको उपचार कहाँ गरिएको भन्ने कुरा भने खुलाइएको थिएन । लामो समयको सार्वजनिक अनुपस्थिति र गोप्य उपचारपछि देउवाको यो उपस्थिति कांग्रेसको आन्तरिक राजनीतिक गतिविधिको लागि महत्त्वपूर्ण मानिएको छ।
