काठमाडौं,२८ असाेज । नेपाली कांग्रेसले उपसभापति पूर्णबहादुर खड्कालाई पार्टीको कार्यवाहक सभापतिको जिम्मेवारी दिएको छ। मंगलबार सानेपास्थित पार्टी केन्द्रीय कार्यालयमा बसेको केन्द्रीय समिति बैठकले खड्कालाई कार्यवाहक सभापतिको जिम्मेवारी दिने निर्णय गरेको महामन्त्री विश्वप्रकाश शर्माले जानकारी दिएका छन्।
सभापति शेरबहादुर देउवाले बैठकलाई सम्बोधन गरेलगत्तै बैठक स्थगित गरिएको थियो। पार्टीका अनुसार आगामी बिहीबार बस्ने केन्द्रीय समिति बैठकको अध्यक्षता अब कार्यवाहक सभापति खड्काले गर्नेछन्।
जेनजी आन्दोलनका क्रममा गत भदौ २३ र २४ गते गम्भीर घाइते भएका देउवा मंगलबार पहिलोपटक सार्वजनिक भएका हुन्। उनी पत्नी आरजु राणा देउवासहित पार्टी कार्यालय पुगेका थिए।
बैठकलाई सम्बोधन गर्दै देउवाले आन्दोलनमा ज्यान गुमाउनेप्रति श्रद्धाञ्जली अर्पण गर्दै शान्ति र स्थिरताका लागि सबै पक्ष जिम्मेवार हुनुपर्ने बताए। साथै, उनले सरकारले आगामी फागुन २१ गतेका लागि घोषणा गरेको निर्वाचनमाथि पनि प्रश्न उठाउँदै भने, “देशमा शान्ति, सुरक्षा र निष्पक्ष वातावरण बिना स्वतन्त्र निर्वाचन सम्भव छैन। सरकारको ध्यान यसतर्फ जानुपर्छ।”
देउवाको सार्वजनिक उपस्थितिसँगै कांग्रेसभित्र नेतृत्व संक्रमणको चर्चा सुरु भएको छ भने कार्यवाहक सभापति खड्काको जिम्मेवारीलाई पार्टी एकतासँग जोडेर हेरिएको छ।
