बीरगन्ज,२९ असाेज । जनता समाजवादी पार्टी (जसपा), पर्सा जिल्ला समितिद्वारा आज बीरगन्जस्थित टाउन हलमा आयोजित “अगुवा कार्यकर्ता भेला कार्यक्रम” उत्साहपूर्ण वातावरणमा शुरू भएको छ।
कार्यक्रमको अध्यक्षता जिल्ला अध्यक्ष सिंगासन साह तेलीले गर्नुभयो । भने उपमहासचिव प्रदीप यादव प्रमुख अतिथि रहनुभयो। त्यसैगरी बीरगन्ज महानगरपालिकाका मेयर राजेशमान सिंह विशिष्ट अतिथि रहनुभएको थियो।
भेला बिहान ११ बजे सुरु भएको थियो। कार्यक्रममा जसपाका जिल्ला, नगर र वडा तहका अगुवा कार्यकर्ता, सदस्यहरू, युवा र महिला नेतृहरू, साथै विभिन्न क्षेत्रका समाजसेवीहरू उत्साहपूर्वक सहभागी भएका थिए। कार्यक्रम हलमा पार्टीका झण्डा, ब्यानर र नाराले सजाइएको थियो, जसले वातावरणलाई जोशपूर्ण बनाएको थियो।
हस्तलिखित कार्यतालिकाअनुसार कार्यक्रममा स्वागत मन्तव्य, पार्टीको नीतिगत दिशा, संगठन सुदृढीकरणका उपायहरू, आगामी राजनीतिक रणनीति, र स्थानीय समस्या समाधानका सम्भावित उपायहरू विषयमा विस्तृत छलफल गरिएको थियो।
नेताहरूले जसपाको समाजवादी विचारधारा, समावेशी राजनीति र जनमुखी शासन प्रति प्रतिबद्धता दोहोर्याएका थिए।
मुख्य अतिथि प्रदीप यादवले कार्यकर्ताहरूलाई संगठनभित्र एकता, अनुशासन र जनसंपर्क सुदृढ पार्न आग्रह गर्नुभयो। उहाँले भन्नुभयो,“जसपा जनताको हितका लागि बनेको पार्टी हो। हाम्रा सिद्धान्त र आन्दोलनले देशमा सामाजिक न्याय र समान अवसरको बाटो खोल्नेछ।”
त्यस्तै, मेयर राजेशमान सिंहले स्थानीय तहमा विकास र सुशासन सुनिश्चित गर्न पार्टीका कार्यकर्ताहरूले अग्रणी भूमिका खेल्नुपर्ने बताउनुभयो। जिल्ला अध्यक्ष सिंगासन साह तेलीले संगठनलाई जनस्तरमा अझ मजबुत बनाउँदै “जनसेवामार्फत समाजवादको मूल्य व्यवहारमा उतार्नुपर्ने”मा जोड दिनुभयो।
कार्यक्रमको अन्त्यमा अध्यक्ष शाहले सहभागी सबैलाई धन्यवाद ज्ञापन गर्दै भने,“हामी सबै मिलेर जसपालाई जनताको पार्टी बनाउनेछौं। हाम्रो प्रतिबद्धता जनसेवा, समानता र राष्ट्रिय एकतामा केन्द्रित रहनेछ।”
भेलाले पार्टीभित्र संगठनिक एकता, जनसंपर्क विस्तार, र आगामी निर्वाचन तयारीका लागि ठोस दिशा तय गरेको नेताहरूले बताएका छन्।
