वीरगञ्ज — जनता समाजवादी पार्टी (जसपा) पर्सा जिल्लाद्वारा आयोजित अगुवा कार्यकर्ता भेला उत्साहपूर्ण वातावरणमा सम्पन्न भएको छ। भेलामा जसपाका जिल्ला, नगर, वडा तहका अगुवा कार्यकर्ता, युवा र महिला नेतृहरू साथै विभिन्न क्षेत्रका समाजसेवीको उल्लेखनीय उपस्थिति रहेको थियो। हल पार्टीका झण्डा, ब्यानर र नाराले सजाइएको थियो, जसले कार्यक्रमलाई उत्साहपूर्ण र ऊर्जा पूर्ण वातावरण दिएको थियो।
कार्यक्रममा स्वागत मन्तव्यपछि पार्टीको नीतिगत दिशा, संगठन सुदृढीकरण, आगामी राजनीतिक रणनीति, र स्थानीय समस्या समाधान विषयमा छलफल गरिएको थियो। नेताहरूले जसपाको समावेशी समाजवादी विचारधारा र जनमुखी शासनप्रति प्रतिबद्धता दोहोर्याए।
मुख्य अतिथि प्रदीप यादवले संगठनभित्र एकता र अनुशासनलाई प्राथमिकता दिँदै कार्यकर्ताहरूलाई जनसंपर्क विस्तारमा सक्रिय हुन आग्रह गर्नुभयो। उहाँले भन्नुभयो,
“जसपा जनताको हितका लागि बनेको पार्टी हो। हाम्रो आन्दोलनले देशमा सामाजिक न्याय र समान अवसरको बाटो खोल्नेछ।”
- Advertisement -
विशिष्ट अतिथि र वीरगञ्ज मेयर राजेशमान सिंहले नयाँ नेतृत्व र युवा पुस्ताको हस्तान्तरणको आवश्यकता औंल्याउनुभयो। मेयर सिंहले भन्नुभयो,
“म आफैं युवा पुस्तासँगै काम गर्ने व्यक्ति हुँ। नयाँ नेतृत्व लिन युवा आउनुपर्छ, तर केवल कुरा गरेर मात्र होइन, जिम्मेवारीसहित सक्रिय भएर आउनुपर्छ। यदि आज मन्त्री वा मेयर नभएको भए देशको अवस्था के हुन्थ्यो भन्ने प्रश्न आफैंमा छ। युवा पुस्ताले आफ्नो क्षमता अनुसार जिम्मेवारी पुरा गर्नु पर्छ।”
उहाँले युवा शक्ति, संगठनिक अनुभव र जिम्मेवारीलाई सन्तुलित गर्दै मात्र नेतृत्व सक्षम बन्न सक्ने बताउनुभयो। मेयर सिंहले वीरगञ्जमा भएको केही घटनामा आफ्नो दुःख व्यक्त गर्दै, Gen Z आन्दोलनको नाममा नगरमा भएको क्षतिप्रति चिन्ता व्यक्त गर्नुभयो।
कार्यक्रमले युवा नेतृत्व, संगठन सुदृढीकरण र आगामी निर्वाचन तयारीमा स्पष्ट दिशा र रणनीति तय गरेको जसपा नेताहरूले बताएका छन्।
