चितवन,०१ कात्तिक । चितवनको मुग्लिन–नारायणगढ सडकखण्डमा शुक्रबार बिहान भएको श्रृंखलाबद्ध सवारी दुर्घटनामा बस र ट्रकसहित सातवटा सवारीसाधन एकआपसमा ठोक्किँदा सात जना घाइते भएका छन्। दुर्घटनापछि केही समयका लागि सडकमा यातायात पूर्ण रूपमा अवरुद्ध बनेको छ।
जिल्ला प्रहरी कार्यालय चितवनका प्रवक्ता डीएसपी रवीन्द्र खनालका अनुसार बिहान करिब ७ बजे मुग्लिनबाट नारायणगढतर्फ आउँदै गरेको यात्रुवाहक बस, मालबाहक ट्रक र केही निजी सवारीसहित सात वटा गाडी आपसमा ठोक्किएका हुन्।
“दुर्घटनामा सात जना घाइते भएका छन्। उनीहरूको उद्धार गरी उपचारका लागि भरतपुर अस्पताल पठाइएको छ,” डीएसपी खनालले जानकारी दिए। प्राथमिक अनुमान अनुसार सडकमा अचानक ब्रेक लागेको एक ट्रकलाई पछाडिबाट आएको बस ठोक्किएपछि अन्य सवारीहरू पनि सोही क्रममा एकआपसमा ठोक्किएका हुन्।
घाइतेहरूको पहिचान खुलाइएको छैन तर तीमध्ये दुईजनाको अवस्था गम्भीर रहेको बताइएको छ। घटनास्थलमा सशस्त्र प्रहरी, ट्राफिक प्रहरी र स्थानीय बासिन्दाहरूले उद्धार कार्यमा सहयोग गरिरहेका छन्।उद्धारका क्रममा प्रहरी र स्थानीयहरूले दुर्घटनामा परेका सवारीहरू हटाउँदै एक लेन खुलाउने प्रयास गरिरहेका छन्।
स्थानीयले उक्त सडकखण्डमा लगातार दुर्घटना भइरहेकाले स्पीड नियन्त्रण र लेन व्यवस्थापनमा सुधार गर्न माग गरेका छन्।यात्रीहरूको भनाइअनुसार बिहानको समयमा घना कुहिरो र चिप्लो बाटोका कारण दृश्यता कमजोर भएको थियो।
डीएसपी खनालका अनुसार दुर्घटनाको विस्तृत अनुसन्धानका लागि प्रहरी टोली घटनास्थलमै खटिएको छ।“हाल सडक आंशिक रूपमा खुलेको छ। दुर्घटनामा संलग्न सवारीहरू सडक छेउमा राखी ट्राफिक सुचारु गर्ने काम भइरहेको छ,” उनले भने।
मुग्लिन–नारायणगढ सडकखण्ड देशकै व्यस्त र जोखिमयुक्त सडकमध्ये एक हो। लगातार भारी सवारी आवागमन, घुम्ती मोड र सँकुचित बाटोका कारण प्रत्येक वर्ष दर्जनौं दुर्घटना हुने गरेको ट्राफिक प्रहरीको तथ्यांकले देखाउँछ।
