काठमाडौँ,०१ कात्तिक । नेपाल राष्ट्र बैंकले तिहार बिदाका दिनहरूमा पनि बैंकिङ सेवा अवरुद्ध हुन नदिन सबै वाणिज्य बैंक, विकास बैंक र वित्त कम्पनीहरूलाई आवश्यक व्यवस्था गर्न आग्रह गरेको छ।
केन्द्रीय बैंकले शुक्रबार एक परिपत्र जारी गर्दै भाइटिकाको दिन बाहेक अन्य दिनहरूमा कम्तीमा केही शाखा वा काउन्टर खुला राखी सेवा प्रवाह गर्न निर्देशन दिएको हो। राष्ट्र बैंकका अनुसार तिहारको समयमा पनि भन्सार जाँचपास, मालसामान आपूर्ति, अन्तर्राष्ट्रिय कारोबार र सरकारी भुक्तानी प्रक्रिया सहज बनाउन बैंकिङ सेवा निरन्तर सञ्चालन आवश्यक देखिएको हो।
“देशभरको आपूर्ति शृङ्खला र भुक्तानी प्रणाली अबरुद्ध नहोस् भन्ने उद्देश्यले यस्तो आग्रह गरिएको हो,” राष्ट्र बैंक स्रोतले बतायो।यसअन्तर्गत क वर्ग (वाणिज्य बैंक), ख वर्ग (विकास बैंक) र ग वर्ग (वित्त कम्पनी) सबैले आफ्नो व्यवसायिक क्षेत्र र ग्राहकको आवश्यकता अनुसार सीमित सेवा केन्द्र सञ्चालन गर्नुपर्ने छ।
राष्ट्र बैंकले आज शनिबारका लागि रियल टाइम ग्रस सेटलमेन्ट (RTGS) प्रणाली पनि सञ्चालनमा रहने जनाएको छ।
यो प्रणाली बैंकबीच ठूला रकमको भुक्तानी र सेटलमेन्ट तुरुन्त गर्न प्रयोग हुने भएकाले, बिदामा पनि कारोबार सहज हुने अपेक्षा गरिएको छ।
राष्ट्र बैंकका अनुसार शनिबार बिहान १० बजेदेखि अपराह्न ४ बजेसम्म आरटीजीएस प्रणाली सञ्चालनमा रहनेछ।
नेपालका प्रमुख भन्सार नाका—बिरगंज, भैरहवा, विराटनगर, भद्रपुर, र नेपालगञ्ज—मा तिहारको बेला पनि मालसामानको आवागमन हुने भएकाले, बैंकिङ प्रणाली सञ्चालन आवश्यक रहेको बताइएको छ।
भन्सार राजस्व भुक्तानी, आयात शुल्क, तथा बिल अफ लिडिङ र लेटर अफ क्रेडिट (LC) जस्ता कारोबार रोकिएमा आपूर्ति प्रणाली प्रभावित हुने भएकाले राष्ट्र बैंकले वैकल्पिक शाखा र डिजिटल माध्यम सक्रिय राख्न निर्देशन दिएको हो।
राष्ट्र बैंकले सबै नागरिक र व्यवसायीलाई पनि मोबाइल बैंकिङ, इन्टरनेट बैंकिङ, क्यूआर पेमेन्ट र एटिएम सेवा प्रयोग गर्न आग्रह गरेको छ।बैंकहरूलाई यी प्रणालीहरू अबाध सञ्चालन सुनिश्चित गर्न प्राविधिक टोली स्ट्यान्डबाइ राख्न पनि निर्देशन दिइएको छ।
नेपाल बैंकर्स संघका एक पदाधिकारीका अनुसार, अधिकांश वाणिज्य बैंकहरूले मुख्य सहरका शाखा र औद्योगिक क्षेत्र नजिकका काउन्टरहरू सञ्चालन गर्ने तयारी गरेका छन्।“भाइटिकाको दिनबाहेक अन्य दिन सामान्य कारोबार हुने गरी तालिका बनाइएका छन्,” उनले भने।
