सर्लाही,०१ कात्तिक । सर्लाहीकाे धनकौल गाउँपालिका–३ हरकठवाका ११ वर्षीया सोनी कुमारी साह बिहीबार खोलामा डुबेर बेपत्ता भएकी छन्। तीन दिनदेखि बेपत्ता बालिकाको उद्धारका लागि सशस्त्र प्रहरी बल नेपालका गोताखोरसहितको टोली घटनास्थलमा खटिएको छ।
इलाका प्रहरी कार्यालय बरहथवाका डीएसपी निरञ्जन भट्टराईका अनुसार बालिका बिहीवार बिहान आमासँग लुगा धुन र नुहाउन खोलातिर गएकी थिइन्। करिब १२ बजे खोलामा नुहाउने क्रममा खोलाले बगाएपछि उनी बेपत्ता भएकी हुन्। आमा जयकुमारी साहका अनुसार तत्काल उद्धार प्रयास भए पनि सफल नभएको छ।
स्थानीय र प्रहरीको खोजी असफल भएपछि शुक्रबारदेखि सशस्त्र प्रहरी बलका गोताखोर टोली परिचालित गरिएको छ। महोत्तरीको बर्दीवासबाट आएको नौ सदस्यीय टोली शनिबार बिहानदेखि घटनास्थलमा खोजी कार्यमा जुटेको छ।
सशस्त्र प्रहरी नायब निरीक्षक भक्तबहादुर खत्रीका अनुसार खोलाको करिब ७ सय मिटर तल, महिनाथपुरस्थित पुलसम्म खोजी भए पनि बालिकाको अवस्था अझै पत्ता लागेको छैन। उनले भने, “अब डुङ्गाको सहयोग लिएर खोलाको गहिराइ र आसपासका क्षेत्रमा खोजी जारी राख्ने छौँ।”
स्थानीयहरू घटनास्थल वरिपरि सतर्कता अपनाइरहेका छन् र बालिकाको खोजीमा समुदायसमेत सक्रिय रहेको छ।
