काठमाडौँ,०१ कात्तिक । नेकपा एमालेका अध्यक्ष केपी शर्मा ओलीले हालको राजनीतिक अवस्था शान्तिपूर्ण नभएको र चुनाव हुनु अघि सबै अपराधी पक्राउ गरी लुटिएका हतियार फिर्ता ल्याउन आवश्यक रहेको बताएका छन्।
शनिबार च्यासलस्थित पार्टी कार्यालयमा आयोजित चियापान कार्यक्रममा अध्यक्ष ओलीले जेनजी आन्दोलनको क्रममा देशमा सुरक्षा समस्या बढेको आरोप लगाउँदै, “प्रहरीका १२ सय हतियार र एक लाख गोली लुटिएका छन्। साढे पाँच हजार कैदी अझै बाहिर छन्। यस्तो अवस्थामा चुनाव गराउने प्रयास नाटकजस्तो छ,” भने।
अध्यक्ष ओलीले भने, “प्रहरी हाम्रै हो, त्यसको रक्षा गर्नुपर्छ। मलाई जहाँ मन लाग्छ, त्यहाँ जान्छु। तर अपराधी र हतियार नियन्त्रणमा नलिएसम्म निर्वाचन सम्भव छैन। संसद् पुनर्स्थापना हुनेछ।”
उनले बंगलादेशको उदाहरण उल्लेख गर्दै जेनजीले आन्दोलनमार्फत नेतृत्व परिवर्तन गरे पनि त्यहाँको अवस्था जस्तो नेपालमा नहुने स्पष्ट पारे। साथै, आफूमाथि सुरक्षाको खतरामा भएको भन्दै सरकारले त्रास सृजना गरेको आरोप लगाएका छन्।
अध्यक्ष ओलीले जेनजी आन्दोलनका सकारात्मक उद्देश्य भए पनि देशलाई व्यावस्थापनमा समस्या सिर्जना गरिएको र सुरक्षा आवश्यकतालाई सरकारले प्राथमिकता नदिएको बताए। उनले, “जसलाई सुरक्षा चाहिएको छैन, उसलाई दिइएको छ; जसलाई चाहिएको छ, उसलाई फिर्ता गरिएको छैन,” भनी असन्तुष्टि व्यक्त गरे।
