यस वर्षको तिहारमा देशभर विद्युतको माग घट्ने अनुमान गरिएको छ । नेपाल विद्युत प्राधिकरणका अनुसार तिहारका समयमा औद्योगिक र व्यावसायिक क्षेत्रहरू बन्द हुने भएकाले विद्युत खपतमा कमी आउने सम्भावना छ ।
प्राधिकरणका कार्यकारी निर्देशक मनोज सिलवालका अनुसार पछिल्ला केही वर्षयता तिहारका समयमा विद्युत खपत घट्ने प्रवृत्ति देखिएको हो । उहाँले भन्नुभयो, “पहिले तिहारमा घरायसी प्रयोग बढ्ने भएकाले खपत पनि बढ्थ्यो, तर अहिले उद्योग, होटल र रेस्टुरेन्टहरू पर्वका बेला बन्द हुने भएकाले समग्र माग घट्ने देखिन्छ ।”
सिलवालका अनुसार अहिलेको विद्युत प्रणाली पहिलेको भन्दा धेरै सबल भएकाले आपूर्तिमा कुनै समस्या नआउने प्राधिकरणको विश्वास छ । “अहिले प्रणाली बलियो भएकाले मागअनुसार पर्याप्त विद्युत आपूर्ति गर्न सकिन्छ,” उहाँले स्पष्ट पार्नुभयो ।
उहाँका अनुसार तिहार र छठजस्ता ठूला पर्वलाई लक्षित गर्दै नेपाल विद्युत प्राधिकरणले आपूर्ति व्यवस्थापनका सबै तयारी पूरा गरिसकेको छ । नियमित आपूर्तिका लागि कर्मचारीहरू पूर्ण रूपमा खटिने छन् । साथै, वितरण लाइन, सबस्टेशन तथा मर्मत कार्यमा आवश्यक पूर्वतयारी पनि सम्पन्न भइसकेको प्राधिकरणले जनाएको छ ।
सिलवालले थपे, “तीन–चार वर्षयता तिहारका बेला उद्योगहरू नचल्ने भएकाले विद्युत खपत घट्ने देखिन्छ । अब तिहारमा अभावको चिन्ता होइन, पर्याप्त आपूर्तिसहित स्थिर वितरण हाम्रो प्राथमिकता हो ।”
