जनकपुर,०६ कात्तिक । जेनजी आन्दोलनको तातोपन अझै नओस्सिँदै नेकपा (माओवादी केन्द्र) मधेसमा सक्रिय बन्दै चुनावी मैदानतर्फ उन्मुख भएको छ। बुधबार महोत्तरीको रामगोपालपुरमा आयोजित शुभकामना आदान–प्रदान तथा पार्टी प्रवेश कार्यक्रममार्फत माओवादीले आसन्न निर्वाचनका लागि औपचारिक तयारीको सुरुवात गरेको हो।
कार्यक्रमलाई सम्बोधन गर्दै माओवादी केन्द्रका महाधिवेशन आयोजक समिति संयोजक तथा पार्टी अध्यक्ष **पुष्पकमल दाहाल ‘प्रचण्ड’**ले विशेषगरी जेनजी आन्दोलनमा संलग्न युवाहरुलाई निर्वाचन प्रक्रियामा सहभागी भई माओवादीसँग सहकार्य गर्न आह्वान गरे। उनले आन्दोलनले उठाएका मुद्दालाई राजनीतिक रूपान्तरण र स्थायित्वतर्फ मोड्न सबै युवाको योगदान आवश्यक रहेको उल्लेख गरे।
माओवादी केन्द्रले महाधिवेशनको तयारी र चुनावी अभियानलाई एकसाथ अघि बढाउने रणनीति तय गरेको छ। चाडपर्व सकिएलगत्तै देशव्यापी रूपमा जनतामाझ पुग्ने बृहत् अभियान सञ्चालन गर्ने तयारी भइरहेको पार्टीले जनाएको छ।
महोत्तरी जिल्ला इन्चार्ज प्रकाश पोखरेलका अनुसार, जेनजी आन्दोलनपछि ठूला दलहरू सार्वजनिक सभा र सम्मेलन गर्न हिचकिचाइरहेका बेला माओवादीले मधेसमा ठूलो भीड जुटाएर जनतालाई सशक्त सन्देश दिन सफल भएको छ।
राजनीतिक दलहरूबीच आगामी निर्वाचन र संसद पुनर्स्थापनाको विषयमा मतैक्य नहुँदा राजनीतिक वातावरण अन्योलपूर्ण बनेको छ।नेपाली कांग्रेसले चुनावमा जाने वा संसद पुनर्स्थापनाको पक्षमा उभिने भन्ने निर्णय अझै नलिएको बताइएको छ, जबकि नेकपा (एमाले) ले फागुन २१ मा तय भएको निर्वाचन नहुने निष्कर्ष निकाल्दै संसद पुनर्स्थापनामा जोड दिइरहेको छ।
यस्तो अनिश्चिततामाझ माओवादी केन्द्रले रामगोपालपुर सभाबाट निर्वाचनमा जाने अडानलाई पुनः पुष्टि गरेको छ। पार्टीका वरिष्ठ नेता मातृका यादवको उपस्थिति रहेको उक्त कार्यक्रमलाई माओवादीले मधेस प्रदेशमा चुनावी तयारीको बिगुल फुकेको संकेतका रूपमा लिइएको छ।
मधेसमा पार्टीको यो सक्रियता माओवादी केन्द्रले आन्दोलनपछि नयाँ ऊर्जा र विश्वासका साथ पुनः जनतामाझ फर्किएको राजनीतिक सन्देशका रूपमा देखिएको छ।
