वीरगञ्ज–१६, इनर्वा । जनता समाजवादी पार्टीका उपमहासचिव तथा पूर्वमन्त्री प्रदीप यादव र वीरगञ्ज महानगरपालिकाका मेयर राजेशमान सिंहले वीरगञ्ज–१६ इनर्वामा आयोजित ‘विराट कुस्ती प्रतियोगिता–२०८२’ उद्घाटन गर्दै परम्परागत खेलकुद, विशेषगरी कुस्तीको संरक्षण र प्रवर्द्धनमा सबै तहबाट सक्रिय पहल गर्नुपर्ने जोड दिएका छन्।
दुवैले कुस्तीलाई इतिहास, संस्कार र शारीरिक क्षमताको प्रतीक बताउँदै यसले युवामा अनुशासन, साहस र आत्मविश्वास विकास गर्न मद्दत गर्ने बताए। यादव र मेयर सिंहले स्थानीय तह, जनप्रतिनिधि र खेलकुद संघबीच सहकार्य गरी खेलाडीलाई उचित अवसर र प्रशिक्षण प्रदान गर्न सके नेपालले अन्तर्राष्ट्रिय स्तरमा पनि सफलता प्राप्त गर्न सक्ने विश्वास व्यक्त गरे।
इनर्वा महाबीर मन्दिर संरक्षण समाजद्वारा आयोजना गरिएको प्रतियोगितामा ठूलो संख्यामा दर्शकको उपस्थितिले खेलाडीहरूलाई उत्साह र प्रोत्साहन प्रदान गरेको थियो।
