जनकपुर,१२ कात्तिक । धनुषाको क्षिरेश्वरनाथ नगरपालिका–२ रमदैयास्थित जनकपुर–ढल्केबर सडकखण्डको पूर्वपट्टि एक युवक मृत अवस्थामा फेला परेका छन्। मृतक सोही नगरपालिका–५ निवासी ३५ वर्षीय आजिम कवारी रहेको इलाका प्रहरी कार्यालय सखुवा महेन्द्रनगरले जनाएको छ।
बिहान सडकछेउमा शव देखेपछि स्थानीयले प्रहरीलाई खबर गरेका थिए। सूचना पाएलगत्तै प्रहरी टोली घटनास्थल पुगेर मुचुल्का तयार गरी शवलाई पोस्टमार्टमका लागि प्रादेशिक अस्पताल जनकपुर पठाएको प्रहरी निरीक्षक राजाराम यादवले बताए।
उनका अनुसार घटनाको प्रकृति प्रारम्भिक रूपमा स्पष्ट नभएकाले विस्तृत अनुसन्धान सुरु गरिएको छ। प्रहरीले घटनास्थल र वरपरका सिसिटिभी फुटेज संकलन गर्दै घटनाको कारण पत्ता लगाउने प्रयास थालेको छ।
स्थानीयहरूका अनुसार राति उक्त क्षेत्रमा असामान्य गतिविधि देखिएको हुनसक्ने अनुमान गरिएको छ, तर घटनाको वास्तविक कारण प्रहरीको अनुसन्धानपछि मात्र पुष्टि हुने बताइएको छ।
