काठमाडौँ,१२ कातिक । पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकसहित पाँच जनाको पासपोर्ट र स्थान हद विरुद्ध सर्वोच्च अदालतमा रिट दर्ता भएको छ। रिट प्रेम सिलवालले दायर गरेका हुन् र यसको पहिलो सुनुवाइ बिहीबार तय गरिएको छ।
जेन(जी) आन्दोलन दमनबारे जाँचबुझ गर्न गठित आयोगले पूर्वप्रधानमन्त्री ओली, पूर्वगृहमन्त्री लेखक, पूर्वगृहसचिव गोकर्णमणि दुवाडी, राष्ट्रिय अनुसन्धानका पूर्वप्रमुख हुतराज थापा र काठमाडौंका पूर्वसीडीओ छवि रिजालको राहदानी रोक्का गर्न सिफारिस गरेको थियो।
आयोगले सिफारिसमा उल्लेख गरेको छ, “भाद्र २३ र २४ गतेका घटनाको छानबिनका लागि उल्लिखित व्यक्तिहरू अनुसन्धानको दायरामा छन्। तसर्थ, उनीहरूको विदेश भ्रमण रोक लगाइयोस् र छानबिनका लागि कुनै पनि समयमा आयोगमा उपस्थित हुन आवश्यक छ। आयोगको स्वीकृतिविनै काठमाडौं उपत्यका छाड्न नपाउने व्यवस्था गरियोस्।”
सर्वोच्चमा दर्ता भएको रिटमा उक्त रोक्का निर्णय वैध छ कि छैन भनी न्यायिक समीक्षा हुन बाँकी रहेको छ।
