काठमाडौं,१३ कार्तिक । अरब सागर र बंगालको खाडीमा विकसित शक्तिशाली मौसमी प्रणाली ‘मोन्था’को प्रभाव नेपालमा समेत परेको छ। मौसम पूर्वानुमान महाशाखाका अनुसार हाल पश्चिमी वायु, अरब सागरको न्यून चापीय प्रणाली र चक्रवात ‘मोन्था’को संयुक्त प्रभावका कारण देशभर बदली र वर्षा भइरहेको छ।
आज बिहानैदेखि देशका अधिकांश भूभागमा आंशिकदेखि पूर्ण बदली रहेको छ। कोशी, मधेस, बागमती र गण्डकी प्रदेशका धेरै स्थानमा मध्यम वर्षा भइरहेको छ भने केही स्थानमा हिमपात समेत सुरु भएको महाशाखाले जनाएको छ। दिउँसो र राति पनि यी प्रदेशहरूमा मध्यमदेखि भारी वर्षाको सम्भावना रहेको छ।
त्यस्तै, लुम्बिनी प्रदेशमा समेत मध्यमदेखि भारी वर्षा हुने पूर्वानुमान गरिएको छ। कर्णाली र सुदूरपश्चिम प्रदेशका केही स्थानमा हल्का वर्षा, र देशका उच्च पहाडी तथा हिमाली क्षेत्रमा मध्यमदेखि भारी हिमपात हुन सक्ने सम्भावना छ।
मौसमविद्हरूले कोशी, मधेस, बागमती र लुम्बिनी प्रदेशका एक–दुई स्थानमा भारी वर्षा र कोशी, बागमती तथा गण्डकीका हिमाली भूभागमा भारी हिमपातको चेतावनी दिएका छन्।
महाशाखाले पहाडी र हिमाली क्षेत्रका बासिन्दा, यात्रु तथा किसानलाई विशेष सावधानी अपनाउन अनुरोध गरेको छ। नदी–खोलामा पानीको सतह बढ्न सक्ने भएकाले सतर्क रहनु आवश्यक रहेको बताइएको छ।
विशेषज्ञहरूका अनुसार, अरब सागर र बंगालको खाडीमा सक्रिय मौसमी प्रणालीको असरले पूर्वी र मध्य नेपालमा वर्षा र हिमपातका गतिविधि आगामी केही दिनसम्म जारी रहने सम्भावना छ।
