काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले देशभर आन्दोलनरत नर्सहरूको माग तत्काल सम्बोधन गर्न सरकारलाई आग्रह गरेका छन्। उनले नर्सहरूको जायज मागप्रति समर्थन जनाउँदै उनीहरूको सम्मान, सुरक्षा र पेशागत अधिकार सुनिश्चित नगरी जनस्वास्थ्य सेवा प्रणाली सुदृढ हुन नसक्ने बताएका छन्।
प्रचण्डका अनुसार झन्डै डेढ लाख नर्सिङ कर्मचारीहरू तोकिएको तलबमानभन्दा कम पारिश्रमिक, असमान व्यवहार, स्टाफको अभाव, अत्यधिक कार्यदबाब, अस्थायी रोजगारी, सामाजिक सुरक्षाको कमी, कार्यस्थलमा असुरक्षा र तीव्र विदेश पलायनजस्ता समस्याबाट ग्रस्त छन्।
उनले सामाजिक सञ्जालमार्फत प्रतिक्रिया दिँदै भनेका छन्, “देशभरका नर्सहरू आफ्नो अधिकारका लागि सडकमा छन्। उनीहरूको सम्मान र सुरक्षाको ग्यारेन्टी नगरी जनस्वास्थ्य प्रणाली बलियो बन्न सक्दैन। त्यसैले सरकारले तत्काल नर्सहरूको माग सम्बोधन गर्नुपर्नेछ।”
प्रचण्डले नर्सलाई स्वास्थ्य सेवाको मेरुदण्डको रूपमा व्याख्या गर्दै आफ्नो पार्टी माओवादी केन्द्र नर्सहरूको आन्दोलन र मागप्रति ऐक्यबद्ध रहेको स्पष्ट पारेका छन्।
