जनकपुर,१३ कातिक । मधेस प्रदेशका मुख्यमन्त्री जितेन्द्र सोनलले सत्ता गठबन्धनको दायरा विस्तार गरेका छन् । सुरुवातमा पाँच दलको समर्थनमा सरकार गठन गरेका सोनलले हालै नागरिक उन्मुक्ति पार्टी र नेपाल संघीय समाजवादी पार्टीलाई पनि गठबन्धनमा भित्र्याएका छन् ।
कात्तिक २२ गते प्रदेश सभाबाट विश्वासको मत लिने तयारीमा रहेका सोनललाई अहिले संख्यात्मक बहुमतको समस्या त छैन, तर राजनीतिक सन्तुलन कायम राख्नु उनको मुख्य चुनौती बनेको छ । सत्ता साझेदारी, मन्त्रालय भागबण्डा र विकास योजनाको प्राथमिकतामा हुने मतभेदले गठबन्धन अस्थिर बनाउन सक्ने चिन्ता दलहरूभित्र छ ।
प्रदेशसभामा प्रमुख विपक्षी नेपाली कांग्रेस र नेकपा एमालेको संयुक्त शक्ति बलियो बनेको छ । यी दलहरू अवसर मिल्नेबित्तिकै नयाँ सत्ता समीकरण बनाउन सक्रिय हुने संकेत दिइरहेका छन् । कांग्रेसका नेताहरूले मुख्यमन्त्रीको विश्वासको मतपछि रणनीति सार्वजनिक गर्ने बताएका छन् ।
त्यसैगरी, जनमत पार्टीभित्रको विभाजनले पनि प्रदेशको राजनीतिक समीकरणमा नयाँ मोड ल्याउन सक्छ । प्रदेश प्रमुख र सभामुख फरक पृष्ठभूमिका भएकाले सत्ता सञ्चालनमा थप चुनौती देखिएको छ ।
सोनलका लागि अर्को ठुलो परीक्षा भनेको सुशासन र पारदर्शिताको हो । विगतका सरकारहरू भ्रष्टाचार र अनियमितताका कारण आलोचित भएका थिए । जेनजी आन्दोलनपछि जनतामा सुशासनप्रति उच्च अपेक्षा छ, जसको कारण अहिले सरकारको हरेक निर्णय जनताका आँखामा छ ।
संघीय सरकारले खर्च कटौती गरेकोले प्रदेशमा प्रशासनिक असन्तुष्टि बढेको छ । करार कर्मचारी कटौती र आर्थिक संकटबीच सोनलले राजनीतिक स्थायित्व र वित्तीय व्यवस्थापन दुवै सन्तुलन गर्नुपर्नेछ ।
राजनीतिक विश्लेषकहरू भन्छन् अब सोनलका लागि ‘संख्या जुटाउनु’ भन्दा ठूलो कुरा ‘विश्वास जोगाउनु’ हो । भ्रष्टाचार नियन्त्रण, पारदर्शी शासन र अधिकारको प्रभावकारी कार्यान्वयन गर्न सके उनले मधेसमा नयाँ राजनीतिक संस्कृतिको सुरुवात गर्न सक्छन् ।
