कलैया, १३ कात्तिक । बारामा टाटा सुमोले ठक्कर दिँदा एक पैदल यात्रीको मृत्यु भएको छ । परवानीपुर गाउँपालिका वडा नं। २, मुसहरीस्थित रामपुर टोकनीबाट लिपनी तर्फ जाँदै गरेको ना १ ज ७३७३ नम्बरको टाटा सुमोले पैदल यात्रीलाई ठक्कर दिएको हो।
जिल्ला प्रहरी कार्यालय बाराका अनुसार मृत्यु हुने व्यक्ति परवानीपुर–२ का ६५ वर्षीय गौरी शंकर साह हुन्। ठक्करसँगै सुमो बिजुलीको पोलमा पनि ठोकिँदा पोल भाँचिएको प्रहरीले जनाएको छ।
सुमो चालक, प्रसौनी गाउँपालिका–७ का २२ वर्षीय राजन साहलाई प्रहरीले नियन्त्रणमा लिएको छ। उनलाई इलाका प्रहरी कार्यालय प्रसौनीमा राखिएको छ।
घटनास्थलबाट शव प्रादेशिक अस्पताल कलैयामा पोष्टमार्टमका लागि पठाइएको छ भने थप अनुसन्धान जारी रहेको जिल्ला प्रहरी कार्यालयले जनाएको छ।
