चितवन, १४ कात्तिक । रौतहटकाे गौरबाट काठमाडौँतर्फ गइरहेको यात्रुबाहक बस चितवनको भरतपुर महानगरपालिका–९ टिकौली जंगल क्षेत्रमा आज बिहान दुर्घटनाग्रस्त हुँदा ३३ जना यात्रु घाइते भएका छन् ।
सशस्त्र प्रहरी बल नेपाल मुख्यालयका सह–प्रवक्ता शैलेन्द्र थापाका अनुसार दुर्घटनापछि तत्काल उद्धारकार्य गरी घाइतेहरूलाई चितवन मेडिकल कलेज, नेशनल सिटी अस्पताल र भरतपुर अस्पतालमा उपचारका लागि पठाइएको छ । उनका अनुसार सबै घाइतेहरूको अवस्था सामान्य रहेको छ र कसैको ज्यान जाने अवस्था छैन ।
दुर्घटनामा परेका बस (ना ५ ख ५८७४) गौरबाट काठमाडौँतर्फ गइरहेको थियो । बिहान करिब ५:३० बजे टिकौली जंगलको घुम्ती नजिक चालकको नियन्त्रण गुम्दा बस सडक छेउमा पल्टिएको बताइएको छ । बसमा करिब ४५ जना यात्रु सवार थिए ।
घटनास्थलमा सशस्त्र प्रहरी, नेपाल प्रहरी र स्थानीयबासीहरूले संयुक्त रूपमा उद्धारकार्य सञ्चालन गरेका थिए । दुर्घटनाका कारण पूर्व–पश्चिम राजमार्गको सो खण्ड केही समय अवरुद्ध भएको भए पनि अहिले दुवैतर्फको सवारी आवागमन पुनः सामान्य बनेको प्रहरीले जनाएको छ ।
