काठमाडौं,१४ कात्तिक । राष्ट्रिय स्वतन्त्र पार्टी (रास्वपा) का उपसभापति डा. स्वर्णिम वाग्लेले जेन–जी आन्दोलनका उपलब्धिहरूलाई संस्थागत गर्दै अघि बढ्नुपर्नेमा जोड दिएका छन्।
शुक्रबार पार्टीले आयोजना गरेको कार्यक्रममा वाग्लेले जेन–जी आन्दोलनले सबै राजनीतिक दलहरूमा रूपान्तरणको दबाब बढाएको उल्लेख गर्दै, त्यस उपलब्धिलाई संस्थागत नगरी अघि बढ्न नहुने बताए। उनले भने,
“विगतका आन्दोलनबाट प्राप्त दुर्लभ उपलब्धिहरूलाई जोगाउँदै नयाँ उपलब्धि संस्थागत गर्न र मुलुकलाई सुशासनतर्फ लैजान निर्वाचनमा जानु अपरिहार्य छ।”
उपसभापति वाग्लेले संविधान र कानुनमा आएका डिरेलहरूलाई ट्र्याकमा ल्याउनुपर्ने आवश्यकतामा पनि जोड दिए। उनले बताए,“अग्रगमनको बाटोमा अघि बढ्दा विधि, विधान र संविधान मिच्न मिल्दैन। तर, केही डिरेल भएका कुराहरूलाई सुधार्न र ट्र्याकमा ल्याउन आवश्यक छ, र यस कार्यमा हामी नै अग्रणी हुनुपर्छ।”
उनले राजनीतिक रूपान्तरणका उदाहरणस्वरूप पूर्वप्रधानमन्त्री डा. बाबुराम भट्टराईको भूमिका पनि उल्लेख गर्दै भने,
“दल छोडेर स्वतन्त्र राजनीतिक हैसियतमा अघि बढ्ने पात्रहरूले पनि रूपान्तरणको दबाब बढाएको छ। यसलाई सङ्ग्रह गरेर सुशासनतर्फ वैधता दिनु हाम्रो दायित्व हो।”
स्वर्णिम वाग्लेले यसअघि भएका आन्दोलनका उपलब्धि जोगाउँदै नयाँ उपलब्धि स्थापना गर्नु र मुलुकलाई स्थिरता र सुशासनको मार्गमा लैजान रास्वपा अग्रसर रहने प्रतिबद्धता व्यक्त गरेका छन्।
