बीरगन्ज,१५ कातिक । बीरगन्जमा दसैं मेलाको रात भएको ग्याङ फाइटमा युवकको मृत्यु भएपछि पक्राउ परेका चार जनालाई जिल्ला अदालतले पुर्पक्षका लागि थुनामा पठाएको छ।
गत असोज १४ गते राति साढे ११ बजेतिर वीरगन्ज महानगरपालिका–१० गीता मन्दिर सडकछेउमा लागेको गहवामाई मेलामा दुई समूहबीच विवाद हुँदा २० वर्षीय शिवम साह कानु (गोल्डेन) लाई कुटपिट र चक्कु प्रहार गरिएको थियो। गम्भीर घाइते भएका साहको घटनास्थलमै मृत्यु भएको थियो।
घटनापछि प्रहरीले ‘खुनी दरिन्दे’ नामक ह्वाट्सअप समूह सञ्चालन गर्ने समूहका चार सदस्यलाई पक्राउ गरेको थियो। पर्सा प्रहरी प्रवक्ता डीएसपी हरिबहादुर बस्नेतका अनुसार पक्राउ परेका मध्ये वीरगन्ज–२४ रामगढवाका १९ वर्षीय गौतम पटेल, २० वर्षीय सुभांकर चौरसिया, २२ वर्षीय अमिरी पटेल उर्फ करणप्रसाद पटेल र एक १७ वर्षीय किशोर रहेका छन्।
पक्राउ परेकालाई शुक्रबार जिल्ला अदालतमा पेश गरिएको थियो। अदालतको आदेशअनुसार चारै जनालाई पुर्पक्षका लागि कारागार चलान गरिएको प्रहरीले जनाएको छ।
