सप्तरी,१५ कात्तिक । सप्तरीको बोदेबर्साईन नगरपालिकामा शनिबार करेन्ट लागेर एक महिलाको मृत्यु भएको छ भने दुईजना घाइते भएका छन् ।
नगरपालिको वडा –२ बैरियास्थित लुगा सुकाउने क्रममा फलामको तारमा करेन्ट प्रवाह भई २८ वर्षीय मालतीदेवी साहको मृत्यु भएको हो । करेन्ट लागेर गम्भीर घाइते साहलाई उपचारका लागि छिन्नमस्ता अस्पताल राजविराज ल्याइएकोमा चिकित्सकले मृत घोषणा गरेको जिल्ला प्रहरी कार्यालय सप्तरीका प्रहरी नायब उपरीक्षक डम्बरबहादुर पुरीले जानकारी दिनुभयो ।
मालतीलाई बचाउने क्रममा करेन्ट लागेर घाइते हुनुभएका उहाँकी सासू ५० वर्षीया सीतादेवी साह र छिमेकी ६० वर्षीया रामपृत साहको सोही अस्पतालमा उपचार भइरहेको उहाँले बताउनुभयो ।
स्थानीय मोहन साहको घरमा रहेको विद्युत बोर्डबाट लुगा सुकाउने फलामको तारमा करेन्ट प्रवाह हुँदा लुगा सुकाउने क्रममा साहकी बुहारी मालतीदेवी साह, उहाँलाई बचाउने क्रममा सासू सीतादेवी साह र छिमेकी रामपृत साह पनि करेन्टको चपेटामा परेर घाइते भएको जिल्ला प्रहरी कार्यालय सप्तरीले जनाएको छ ।
