काठमाडौं,१७ कातिक । नेकपा एमालेका महासचिव शंकर पोखरेलले पार्टीले आगामी मंसिर २७ गते काठमाडौंमा इतिहासकै सर्वाधिक ठूलो जनसभा आयोजना गर्ने जानकारी दिएका छन्।
सोमबार प्रेस चौतारी नेपालमा आयोजित पत्रकार सम्मेलनमा बोल्दै पोखरेलले भने, “जनता प्रमुख दलबाट अलग भइसकेको भन्ने अहिले प्रचार भइरहेको गलत भाष्यलाई गलत साबित गर्न हामी जनसभा गर्न लागेका छौं।”
उनका अनुसार, सचिवालयको निर्णयअनुसार देशभर वडास्तरीय, पालिका तथा जिल्ला स्तरमा जनसभा र र्याली कार्यक्रम हुनेछन्। यसक्रममा कात्तिक २२ गते वडास्तरीय भेला, २५ गते पालिकास्तरीय र्याली, २९ गते जिल्लास्तरीय जनसभा, र मंसिर ६ गते उपत्यकास्तरीय र्याली तथा सभा आयोजना गरिने छ।
पोखरेलले थपे, “२७ गते काठमाडौंमा आयोजना हुने हाम्रो जनसभा नेपालको इतिहासकै सबैभन्दा ठूलो हुनेछ। यसले देखाउनेछ जनता कसको साथमा छ। जनता कहिल्यै हिंसा, अराजकता र लुटपाटको समर्थनमा हुन सक्दैन।”
