काठमाडौँ, १७ कात्तिक । २३ र २४ भदौको आन्दोलनका क्रममा घाइते भएका नागरिक र मृतकका परिवारलाई अर्थ मन्त्रालयले अहिलेसम्म कुल १२ करोड ८० लाख रुपैयाँ राहत रकम निकासा गरेको छ।
मन्त्रालयका अनुसार घाइते २ हजार ४२९ जनालाई प्रतिव्यक्ति २० हजार रुपैयाँ रकम उपलब्ध गराइएको छ, जसको कुल रकम ४ करोड ८५ लाख ८० हजार रुपैयाँ हुन्छ। मृतकका परिवारका लागि प्रतिपरिवार १५ लाख रुपैयाँ दरले सहायता, काजकिरिया, खाना र यातायात खर्च प्रदान गरिएको छ। अहिलेसम्म ५३ परिवारले यस राहत प्राप्त गरेका छन्, जसको कुल रकम ७ करोड ९५ लाख रुपैयाँ पुग्छ।
त्यस्तै, आन्दोलनका क्रममा सुरक्षाकर्मीका सवारी साधनमा भएको क्षति पूर्ति गर्न ठूलो बजेट पनि छुट्याइएको छ। नेपाल प्रहरीले १०६ सवारी साधन (१०० पिकअप र ६ कैदी वाहन) खरिदका लागि ४५ करोड ३० लाख रुपैयाँ थप बजेट पाएको छ। सशस्त्र प्रहरी बल नेपालले ५० भन्दा बढी सवारी साधन (२० पिकअप, २० दंगा नियन्त्रक वाहक, २ एम्बुलेन्स, ३ डिजास्टर रेस्क्यू भ्यान र ५ ट्रक) खरिदका लागि २३ करोड ५ लाख रुपैयाँ प्राप्त गरेको छ।
अर्थ मन्त्रालयले यसमार्फत आन्दोलनमा प्रभावित नागरिक र सुरक्षाकर्मीको राहत सुनिश्चित गरेको जनाएको छ।
