काठमाडौँ,१८ कातिक । पूर्वराष्ट्रपति विद्यादेवी भण्डारी आज जिल्ला प्रशासन कार्यालय काठमाडौंबाट नागरिकताको प्रतिलिपि लिन जाँदैछिन्। भदौ २४ गते जेन–जी आन्दोलनसँगै भएका प्रदर्शनका क्रममा उनको निजी निवासमा आगजनी हुँदा नागरिकता सहितका महत्वपूर्ण कागजात जलेर नष्ट भएका थिए।
भण्डारी दिउँसो २ बजे जिल्ला प्रशासन कार्यालय पुग्ने कार्यक्रम रहेको प्रमुख जिल्ला अधिकारी ईश्वरराज पौडेलले जानकारी दिए। उनका अनुसार, प्रतिलिपिका लागि निवेदन दर्ता भएपछि प्रक्रिया अनुसार नागरिकता बुझ्न भण्डारी कार्यालय भ्रमणमा जाँदैछिन्।
प्रमुख जिल्ला अधिकारी पौडेलले भण्डारीको आगमनले प्रशासनको सेवा प्रवाह पुनः सामान्य अवस्थामा फर्किएको सन्देश जाने आशा व्यक्त गरे। उनका अनुसार, “उहाँ कार्यालय आउँदा गत घटनापछि प्रभावित भएको प्रशासनिक सेवा फेरि सामान्य बन्दै गएको छ भन्ने सकारात्मक सन्देश पनि जानेछ,” उनले भने।
भदौ २४ को प्रदर्शनका क्रममा जिल्ला प्रशासन कार्यालय काठमाडौंको भवन समेत आगलागीबाट क्षतिग्रस्त भएको थियो।
