काठमाडौं,१९ कात्तिक । पूर्व प्रधानन्यायाधीश सुशीला कार्कीलाई प्रधानमन्त्रीमा नियुक्त गर्ने राष्ट्रपतिको कदमविरुद्ध दायर भएको रिट निवेदनमा आज संवैधानिक इजलासमा पेसी तोकिएको छ ।
आज प्रधानन्यायाधीश प्रकाशमान सिंह राउत सहित न्यायाधीशहरू सपना प्रधान मल्ल, हरिप्रसाद फुयाँल, मनोजकुमार शर्मा र सारङ्गा सुवेदीको संवैधानिक इजलासमा सुनुवाइका लागि उक्त रिटको पेसी तोकिएको हो । अधिवक्ता डा. पुण्यप्रसाद खतिवडाले दायर गरेको रिटमा राष्ट्रपति रामचन्द्र पौडेलले भदौ २३ र २४ गतेको जेनजी आन्दोलनपछि संविधानको सीमा बाहिर गएर पूर्व प्रधानन्यायाधीशलाई प्रधानमन्त्री नियुक्त गरेको दाबी गरिएको छ, जसले गर्दा संविधानको धारा ७६ र १३२ (२) को ठाडो उल्लङ्घन भएको जिकिर छ ।
रिट निवेदकले पूर्व प्रधानन्यायाधीश संवैधानिक रूपमा प्रधानमन्त्री बन्न नमिल्ने भन्दै राष्ट्रपतिले संविधानको पालना नगरेको आरोप लगाएका छन्, साथै यो अवस्थामा नेपाली सेना लगायत राजनीतिक दल, राष्ट्रियसभाका अध्यक्ष र प्रतिनिधिसभाका सभामुखसमेत जिम्मेवार रहेको भन्दै उनीहरूलाई विपक्षी बनाइएको छ ।
रिटमा राष्ट्रपतिलाई बाधा अड्काउ फुकाउने अधिकार संविधानले नदिएको र धारा ३०५ मा दिइएको अधिकारको समयावधि पहिल्यै समाप्त भइसकेको अवस्थामा आवश्यकताको सिद्धान्तको सहारा लिन नमिल्ने अडान राखिएको छ।
