वीरगन्ज,१९ कात्तिक । सशस्त्र प्रहरी पर्साले कटुवा पेस्तोलसहित दुइ जनालाइ पक्राउ गरेको छ । नेपाल/भारत सीमा स्तम्भ नजिकैबाट बुधबार अपरान्ह कटुवा पेस्तोलसहित दुइ जनालाई पक्राउ गरिएको सशस्त्र प्रहरीले जनाएको छ । गस्ती गर्ने क्रममा सीमा स्तम्भ नम्बर ३९०/२२ बाट कटुवा पेस्तोलसहित उनीहरुलाई पक्राउ गरेको सशस्त्र प्रहरी बल पर्साका प्रवक्ता विश्वराज योन्जनले बताए ।
उनका अनुसार पक्राउ पर्नेमा वीरगन्ज महानगरपालिका- ५ कुम्हाल टोल निवासी १८ वर्षका सुमित कुमार मण्डल र जितपुरसिमरा उपमहानगरपालिका-८ बस्ने २८ वर्षका सन्जय कुमार साह कलवार छन् । झाडीमा लुकीछिपी बस्दै गरेका उनीहरुको साथमा रहेको बोराभित्रबाट कटुवा पेस्तोल बरामद भएको प्रवक्ता योन्जनले बताए ।
पक्राउ परेकाहरुलाइ आवश्यक कारवाहीका लागि जिल्ला प्रहरी पर्साको जिम्मा लगाइएको छ । यसबारे थप अनुसन्धान भइरहेको पर्सा प्रहरीले जानकारी दिएको छ ।
