काठमाडौँ,२० कातिक । नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले आफ्नो पार्टी मुलुकको प्रमुख राजनीतिक शक्ति बन्ने दाबी गरेका छन्। बुधबार राजधानीको भृकुटीमण्डपमा आयोजित एकता घोषणा सभामा सम्बोधन गर्दै उनले आगामी निर्वाचनमा नेकपा देशकै पहिलो दलका रूपमा अगाडि आउने विश्वास व्यक्त गरे।
उनका अनुसार वामपन्थी शक्तिको एकता र वैचारिक स्पष्टताले पार्टीलाई बलियो बनाएको छ। “नेपाली कम्युनिस्ट पार्टीलाई पहिलो शक्ति बन्नबाट अब कसैले रोक्न सक्दैन,” प्रचण्डले भने, “तर त्यसको अर्थ अहंकार होइन। सबैलाई समेटेर मिलेर अघि बढ्नु जरुरी छ।”
उनले पार्टीभित्र देखिएका नेतृत्व हस्तान्तरणका चासो र बहसलाई सकारात्मक रूपमा समाधान गर्न सकिने बताउँदै आगामी महाधिवेशनसम्म यसबारे गम्भीर छलफल हुने जानकारी दिए। “नेतृत्व सधैं एउटै व्यक्तिमा केन्द्रित हुनुपर्छ भन्ने होइन,” प्रचण्डको भनाइ थियो, “वाम आन्दोलनलाई दीर्घकालीन र आधुनिक बनाउने नयाँ सोच आवश्यक छ।”
उनले नेकपा (एकीकृत समाजवादी) का अध्यक्ष माधवकुमार नेपालसमेतसँग यस विषयमा निरन्तर छलफल भइरहेको बताए।
राष्ट्र अहिले बहुपक्षीय संकटको सामना गरिरहेको उल्लेख गर्दै प्रचण्डले वाम मात्र नभई एमालेसहितका लोकतान्त्रिक शक्तिसँग पनि सहकार्य गर्न आफूहरू तयार रहेको स्पष्ट पारे। “राष्ट्र, लोकतन्त्र र राष्ट्रियताको रक्षा अहिलेको पहिलो आवश्यकता हो,” उनले भने, “देशलाई निकास दिन सहकार्य आवश्यक छ।”
कार्यक्रममा शीर्ष वाम नेताहरूको उपस्थिति थियो। सोही समारोहमा एकीकृत नेकपाले वैज्ञानिक समाजवादको दिशामा देश रूपान्तरण गर्ने दीर्घकालीन लक्ष्य प्रस्तुत गरेको थियो।
