जनकपुर,२३ कात्तिक । संविधानको धारा १६८(२) अनुसार सरकार गठनको आह्वान गर्न माग गर्दै मधेस केन्द्रित दलहरूको गठबन्धनले आज मधेस प्रदेश प्रमुखको कार्यालय अगाडि प्रदर्शन गरेको छ।
गठबन्धनमा आवद्ध नेताहरू र कार्यकर्ताहरूले प्रदेश प्रमुख सुमित्रा सुवेदीले सरकार गठनका लागि आवश्यक प्रक्रिया सुरु गर्न ढिलाइ गरेको भन्दै असन्तुष्टि जनाए। उनीहरूले यो ढिलाइ संविधानको मर्म र प्रावधानको उल्लंघन भएको आरोप लगाउँदै तत्काल कदम चाल्न आग्रह गरे।
प्रदर्शनका क्रममा नेताहरूले भने, “संविधान मिचेर कुनै पनि निकाय अघि बढ्न सक्दैन। सरकार गठनमा हुने ढिलाइ जनताको लोकतान्त्रिक अधिकारमा प्रत्यक्ष आघात हो।”
गठबन्धनका दलहरूले सरकार गठनको आह्वान तुरुन्त नगरे आन्दोलनलाई अझ तीव्र बनाउने चेतावनी पनि दिएका छन्।
राजनीतिक विश्लेषकहरूका अनुसार यो प्रदर्शनले मधेस प्रदेशको आगामी सरकार गठन प्रक्रियामा निर्णायक मोड ल्याउने संकेत दिएको छ।
