जनकपुर,२३ कात्तिक । कार्यवाहक मुख्यमन्त्री जितेन्द्र सोनलको नेतृत्वमा रहेको समूहले नयाँ सरकार गठनका लागि सक्रिय पहल थालेको छ। सोनलले पदबाट राजीनामा दिएको एक दिन बितिसक्दा पनि प्रदेश प्रमुख सुमित्रा भण्डारीले नयाँ सरकार गठनका लागि आह्वान नगरेपछि उनले विपक्षी दलहरूसँग मिलेर दबाब सिर्जना गरेका हुन्।
सोनलसहित नेपाली कांग्रेस, नेकपा (माओवादी केन्द्र), जनता समाजवादी पार्टी (जसपा) नेपाल, नेकपा (एकीकृत समाजवादी) र नागरिक उन्मुक्त पार्टीका नेताहरूले संयुक्त रूपमा प्रदेश प्रमुख भण्डारीलाई भेट गरी संविधानको धारा १६८(२) अनुसार बहुमतको आधारमा नयाँ सरकार गठनका लागि आह्वान गर्न माग गरेका छन्।
भेटमा सहभागी नेताहरूमा कांग्रेसका संसदीय दलका नेता कृष्ण यादव, माओवादी केन्द्रका उपनेता युवराज भट्टराई, जसपाका प्रमुख सचेतक रामआशिष यादव, एकीकृत समाजवादीका कनिश पटेल र नागरिक उन्मुक्त पार्टीकी उर्मिलादेवी सिंह रहेका थिए।
कार्यवाहक मुख्यमन्त्री सोनलका अनुसार अहिलेको १०७ सदस्यीय प्रदेशसभामध्ये करिब ८५ सांसदले नयाँ सत्ता गठबन्धनलाई समर्थन जनाइसकेका छन्। उनले भने, “हामीसँग स्थायी सरकार गठन गर्न आवश्यक स्पष्ट बहुमत छ, अब प्रदेश प्रमुखले संवैधानिक प्रक्रिया अघि बढाउनुपर्छ।”
यस घटनाक्रमसँगै मधेश प्रदेशमा नयाँ सत्ता समीकरण बन्ने संकेत देखिएको छ, र आगामी केही दिनभित्र सरकार गठनको प्रक्रिया अघि बढ्ने अपेक्षा गरिएको छ।
