जनकपुर,२५ कातिक । मधेस प्रदेशमा मुख्यमन्त्री सरोजकुमार यादवको नियुक्ति विवादको बीच सात दलले मधेस भवन नियन्त्रणमा लिएका छन् र मुख्यमन्त्री तथा मन्त्रीहरूलाई भवनभित्र प्रवेश गर्न नदिएको छ।
मधेस प्रदेशको राजधानी जनकपुरधामलगायत विभिन्न जिल्लामा आन्दोलन भइरहेकाले प्रशासनिक कामकाज प्रभावित भएको छ। कांग्रेस, माओवादी, नेकपा एकीकृत समाजवादी, जसपा नेपाल, जनमत पार्टी, लोसपा नेपाललगायतका दलले मधेस भवन अगाडि प्रदर्शन गर्दै यादव र अन्य मन्त्रीलाई प्रवेश निषेध गरेका हुन्।
दलहरूले मुख्यमन्त्रीको नियुक्ति अवैध भएको दाबी गर्दै संघीयता र लोकतान्त्रिक मूल्य–मान्यताको रक्षाका लागि आन्दोलनमा उत्रिएको बताएका छन्। जसपा नेपालका प्रदेश सभा सदस्य रामअशिष यादवले भने, “हामी शान्तिपूर्ण आन्दोलनमा छौँ। कर्मचारीहरूलाई आउजाउमा कुनै समस्या छैन।”
मुख्यमन्त्री यादवले मधेस भवनमा कार्यकक्ष तयार नहुँदा पदभार ग्रहण गर्न नसकेको बताए। उनले मंगलबार जनकपुरधामस्थित एक होटलमा पत्रकार सम्मेलन गरी आफ्ना धारणा सार्वजनिक गरेका छन्।
सभामुख रामचन्द्र मण्डलले भने, “मुख्यमन्त्री नियुक्ति संविधान अनुसार वैधानिक छ। अदालतमा मुद्दा दायर भइसकेपछि आन्दोलनको सट्टा कानूनी प्रक्रियालाई कुर्नुपर्छ।”
यो आन्दोलनले मधेस भवनभित्रको प्रशासनिक कामकाज प्रभावित बनेको छ र प्रदेश सरकार गठनको प्रक्रियामा विवाद बढेको छ।
