सिन्धुली, २६ कात्तिक । सिन्धुलीको दुधौली नगरपालिका–४ लक्ष्मीपुरमा बुधबार दिउँसो दुईवटा मोटरसाइकलसँग मालबाहक ट्रक ठोक्किँदा दुई जनाको मृत्यु भएको छ भने चार जना घाइते भएका छन्।
इलाका प्रहरी कार्यालय डकाहाका प्रमुख प्रहरी निरीक्षक सपना खड्काका अनुसार, मदन भण्डारी राजमार्गमा भिमानबाट दुधौलीतर्फ जाँदै गरेको नाप्र१–०२–००२ ख ४११ नम्बरको ट्रक र विपरीत दिशाबाट आएका नाप्र२–०१–००१ प २१४२ र मप्र०२–००६ प ५८४१ नम्बरका दुई मोटरसाइकल ठोक्किँदा दुर्घटना भएको हो।
दुर्घटनामा दुधौली–११ का ३४ वर्षीय रामकुमार कुमर र २५ वर्षीय फुलबाबु धामीको मृत्यु भएको दुधौली नगर अस्पतालले जनाएको छ।
घाइतेहरूमा दुधौली–३ का २६ वर्षीय विप्लव धामी, २७ वर्षीय बुद्धि थारू, २५ वर्षीय सुनिल माझी र ३२ वर्षीय कुशे धामी रहेका छन्। अस्पताल स्रोतका अनुसार विप्लव, बुद्धि र कुशेको अवस्था गम्भीर रहेको छ।
धनकुटा जिल्ला छथर जोरपाटी गाउँपालिका–६ का २५ वर्षीय शेरबहादुर विष्टले चलाएको ट्रकले मोटरसाइकललाई ठक्कर दिँदा घटनास्थल नजिकै आगलागी पनि भएको प्रहरी निरीक्षक खड्काले जानकारी दिए। दुर्घटनामा मप्र०२–००६ प ५८४१ नम्बरको मोटरसाइकल पूर्णरूपमा क्षतिग्रस्त भएको छ।
दुर्घटनापछि ट्रक र चालक प्रहरी नियन्त्रणमा लिइएको छ भने घटनाको विस्तृत अनुसन्धान जारी रहेको सिन्धुली जिल्ला प्रहरी कार्यालयले जनाएको छ।
