काठमाडौँ,२७ कातिक । नेपाल विद्युत् प्राधिकरणले डेडिकेटेड र ट्रंक लाइनमार्फत विद्युत् सुविधा प्रयोग गर्दै बक्यौता तिर्न नमानेका उद्योगहरूबाट पहिलो किस्ता रुपमा १८ करोड ३० लाख रुपैयाँ असुली गरेको छ। करिब सात वर्ष लामो विवादपछि अधिकांश ठूला उद्योगहरूले प्राधिकरणलाई पहिलो किस्ताको बक्यौता बुझाएका छन्।
गत कात्तिक ४ र ७ गते प्राधिकरणले विद्युत् आपूर्ति काटेपछि उद्योगीहरू ‘यूटर्न’ भएका थिए। बुधबारसम्म लाइन काटिएका २५ उद्योगमध्ये २२ उद्योगले बक्यौताको पहिलो किस्ता तिरेका छन्। बाँकी उद्योगमध्ये बुटवल सिमेन्ट र निगाले सिमेन्टले हालसम्म भुक्तानी बाँकी राखेका छन्।
प्राधिकरणका प्रवक्ता राजन ढकालका अनुसार, “बुटवल सिमेन्टले आफ्नो उत्पादन अन्यत्र सारिसकेको र फ्याक्ट्री बन्द गर्न लागेको हुँदा त्यहाँबाट रकम असुल गर्न सकिने अवस्था छैन। एभरेस्ट पेपरमिल र अन्य केही उद्योगले पनि नियमित बिल नतिरेको कारण लाइन काटिएको हो।”
हाल उद्योगहरूले कुल ५ अर्ब ८४ करोड रुपैयाँभन्दा बढीको बक्यौता बाँकी छ। पहिलो किस्ता भुक्तानीका क्रममा जगदम्बा स्टील्स, रिलायन्स स्पिनिङ मिल्स, सिद्धार्थ पेटप्लान्ट, शिवम् सिमेन्ट लगायत प्रमुख उद्योगहरूले रकम बुझाएका छन्।
ऊर्जा, जलस्रोत तथा सिँचाइमन्त्री कुलमान घिसिङले बक्यौता असुली प्रक्रिया अब नयाँ चरणमा प्रवेश गरेको बताएका छन्। मन्त्री घिसिङले सामाजिक सञ्जालमार्फत भनेका छन् कि यसअघि राजनीतिक हस्तक्षेपका कारण असुलीमा अवरोध आएको थियो।
प्रधानमन्त्री कार्यालय र उद्योग महासंघबीचको सहमति अनुसार, पहिलो किस्ता ‘विवादित रकम’को रूपमा धरौटीका रूपमा बुझाउने, लाइन तुरुन्त जडान गर्ने र त्यसपछि पुनरवलोकन तथा न्यायिक प्रक्रिया अघि बढाउने व्यवस्था मिलाइएको छ।
